“Manchester Yunayted”ning sotilishi haqidagi serial davom etmoqda. Klubni sotib olishga asosiy da’vogarlar jamoaning amaldagi rahbarlari bo‘lgan Gleyzerlarga uchinchi va oxirgi taklifni yubordi. Avvaliga Qatar shayxi Jassim ibn Hamad at-Tani poyga favoriti hisoblangan bo‘lsa, ayni vaqtda dunyodagi eng boy britaniyalik Jim Retkliff yetakchiga aylandi.
Ma‘lumot uchun, Retkliff transmilliy kimyo kompaniyasi bo‘lgan Ineos va “Nitssa” futbol klubiga egalik qiladi, shuningdek, Formula-1 ning Mercedes jamoasiga homiylik qiladi. Forbes ma’lumotlariga ko‘ra, uning boyligi 2-may holatiga ko‘ra, 23,7 milliard dollarni (taxminan 19 milliard funt) tashkil qiladi.
Retkliff 69% aksiyaga da’vogarlik qilmoqda — bu Gleyzerlarning ulushi hisoblanadi. Muxlislar qarshi, ular jamoaning to‘liq sotilishini kutmoqda
So‘nggi taklifdan avval Sky Sports Retkliff 50 foizdan oshiqroq aksiyani sotib olishni xohlayotganini ma’lum qilgandi. Shunda Avram va Joel Gleyzerlar ham klubning ma’lum miqdordagi (20 foiz atrofida) aksiyalarini saqlab qoladi.
Yakuniy auksiondan keyin The Times va The Telegraph nashrlari boshqa ma’lumot berdi. Unga ko‘ra, Retkliff “Manchester Yunayted”ning 69 foiz aksiyalarini, ya’ni Gleyzerlarning barcha ulushini sotib olish niyatida ekani ma’lum bo‘ldi. Qayd etilishicha, u 5 milliard funtdan ko‘proq taklif qilgan. Biroz oldinroq CBS Sports jurnalisti Ben Jeykobs Qatar shayxi at-Tani ham 5 milliarddan ortiq pul taklif qilgani, faqat u jamoaning yuz foiz ulushini sotib olishni xohlayotgani haqida yozgan edi.
Shu bilan birga The Telegraph va The Times kelishuvga yaqin bo‘lgan insayderlariga tayanib, Retkliff 5 milliard dollardan ko‘proq pul taklif qilgan yagona shaxs ekanini xabar qildi. Ma’lumot uchun, shu paytgacha hech qaysi sport klubiga bunday miqdorda katta pul taklif qilinmagan. Hozirgacha sport olamidagi eng katta kelishuv amerikacha futbol jamoasi “Denver Broks”ning 4,65 milliard dollarga (3,75 milliard funt) sotilishi bo‘lgan.
Retkliff Gleyzerlar oilasi xohlayotgan 6 milliard funt narxga eng yaqin kelgan da’vogar bo‘ldi va “qizil iblislar”ni sotib olish bo‘yicha poygada yetakchiga aylandi. “Manchester Yunayted” muxlislari esa amerikaliklarning jamoadan to‘liq ketishini istamoqda. Ular “Aston Villa”ga qarshi o‘yin oldidan yana bir bor namoyish o‘tkazdi. Asosiy talab qilinayotgan narsa — jamoaning to‘liq sotilishi.
Ikkala potensial xaridor ham iloji boricha tezroq jamoa boshqaruvini o‘z qo‘liga olishni istamoqda. Kelishuvni rasmiylashtirish jarayoni kamida yozgi transfer oynasi ochilgunga qadar (10-iyun) borishi taxmin qilinmoqda. Shu bois ikkala potensial xaridor ham transferlar va klubning boshqaruv ishlariga rasmiy xariddan oldinroq aralashishni ko‘zlayapti. Ammo Gleyzerlar katta ehtimol bilan bunga rozi bo‘lmaydi.
Retkliff “Manchester Yunayted” muxlisi, biroq shu paytgacha “Chelsi” va “Nyukasl”ni sotib olishga harakat qilgan
Retkliff ulkan sport imperiyasining egasi (“Nitssa” va “Lozanna” futbol klublaridan yelkanli sport jamoalarigacha) va “Manchester Yunayted” muxlisi hisoblanadi. Shu bilan birga u allaqachon “Chelsi”, “Liverpul” va “Nyukasl” jamoalarini sotib olishga harakat qilgan, biroq har doim nimadir xalal bergan.
Milliarderning o‘zi amalga oshmagan kelishuvlarni quyidagicha izohlagan.
Milliardlar evaziga APL klubini sotib olish? Hech qachon pulni bunchalik ahmoqona sarflamayman. Qaytaraman “Manchester Yunayted” va “Chelsi” 3–4 milliard funt turadi. Lekin hech kim hech qachon ular uchun buncha pul to‘lamaydi. “Yunayted”ga qarang, ularning biznesi dahshatli ahvolda. To‘g‘ri boshqaruv ham, to‘g‘ri xaridlar ham yo‘q. Men yosh iqtidorlarni rivojlantirishni xohlayman. Menga “Sauthempton” va “Lill” modeli yoqadi. Ineos’da aqlli yondashuv qadrlanadi, biz pulni behuda sarflamaymiz.
“Qizil iblislar” muxlislari jamoaning amaldagi rahbarlaridan norozi. Gleyzerlar esa klubni sotish uchun yuqori talablar qo‘ymoqda. “Manchester Yunayted”ni sotib olish uchun kurashayotgan qatarlik shayx Jassim ibn Hamad at-Tani va britaniyalik milliarder Jim Retkliff o‘rtasidagi poyga ham qizg‘in pallaga kirmoqda.
Izoh (0)