Rim papasi Fransisk Vatikan Ukrainadagi tinchlikparvarlik missiyasida qatnashishga, shuningdek, bosib olingan hududlardan Rossiyaga majburan olib ketilgan bolalarni vataniga qaytarishda ishtirok etishga tayyorligini aytdi.
Reuters muxbiri Rim-katolik cherkovi rahbari bilan samolyot bortida gaplashishga muvaffaq bo‘lgan — Fransisk Vengriyaga amalga oshirgan uch kunlik tashrifidan keyin Vatikanga qaytayotgan edi.
Rim papasi, xususan, maqsadi jangovar harakatlarni to‘xtatish bo‘lgan Vatikan ishtirokidagi tinchlikparvarlik missiyasi haqida gapirgan, biroq u hozircha tafsilotlarni sir tutishi kerakligini ta’kidlagan.
Fransiskka ko‘ra, u Ukrainada urush masalasini Vengriya prezidenti Viktor Orban va mitropolit Illarion bilan ham muhokama qilgan. Rim-katolik cherkovi rahbari mazkur muzokara tafsilotlarini oshkor etmagan.
Shuningdek, Rim papasi Vatikan Rossiyaga olib chiqib ketilgan ukrain bolalarini uyiga qaytarishda ishtirok etishga tayyorligini bildirgan. “Biz inson qo‘lidan kelishi mumkin bo‘lgan barcha ishni qilishimiz kerak”, — deya qayd etgan u.
Rim papasi Rossiya qo‘shinlari Ukrainaga bostirib kirganidan buyon tomonlarni mojaroni to‘xtatishga chaqirib keladi. 2022-yil oktabrda u Rim papasi Fransisk Rossiya va Ukraina prezidentlari Vladimir Putin va Vladimir Zelenskiyga urushga chek qo‘yishni so‘rab murojaat qilgandi. Oradan ko‘p o‘tmay Makron Rim papasidan Ukrainadagi vaziyatni tartibga solish uchun Putin va Baydenga qo‘ng‘iroq qilishni so‘ragan edi.
Izoh (0)