Turkiya prezidenti Rajab Toyyib Erdo‘g‘on mamlakat razvedka xizmati ISHID terrorchilik tashkiloti yetakchisi Abu Husayn al-Qurayshiyni o‘ldirganini ma’lum qildi. Turkiya yetakchisi bu haqda davlat televideniyesiga bergan intervyusida aytib o‘tgan.
Uning so‘zlariga ko‘ra, jihodchini yo‘q qilish bo‘yicha operatsiya Suriyada 29-aprel kuni o‘tkazilgan, turk razvedkasi Qurayshiyni uzoq vaqtdan beri kuzatib kelgan. Amerika administratsiyasi hozirga qadar Turkiya prezidentining so‘zlarini tasdiqlagani yo‘q.
“Biz buni tasdiqlay olmaymiz. Bundan tashqari, ushbu so‘zlarni isbotlovchi ma’lumotimiz ham yo‘q”, — degan administratsiyaning anonim manbasi.
Anadolu agentligi 1-may kuni tushdan keyin o‘zining ijtimoiy tarmoqlardagi sahifasiga “terrorchi” o‘ldirilgani aytilgan uydan eksklyuziv foto va videolarni e’lon qilgan. Biroq kadrlarda uydan boshqa narsani ko‘rishning imkoni yo‘q.
📌Anadolu has secured exclusive access to the house in northern Syria where Daesh/ISIS leader Abu Hussein al-Qurayshi was eliminated by Turkish forces.
— Anadolu English (@anadoluagency) May 1, 2023
📌The terrorist, who was heading the group since last November, was taken out in a 4-hour operation by Türkiye's MIT intel… pic.twitter.com/52Tj4xNkrJ
Reuters agentligining Suriyadagi manbalariga ko‘ra, operatsiya Suriya shimolidagi Jandarish shahri yaqinida, Turkiya chegarasi yonida amalga oshirilgan.
Qurayshiy ISHID terrorchilik guruhi yetakchisi etib tayinlangani to‘g‘risida 2022-yil oxirlarida ma’lum bo‘lgandi. 2023-yilning fevralida Amerika maxsus kuchlari ISHIDning sobiq yetakchisi Abu Ibrohim al-Hoshimiy al-Qurayshiy yashirilgan joyni aniqlashga muvaffaq bo‘lgandi. Otishmadan keyin u portlovchi qurilmani ishga tushirib yuborib, oila a’zolari bilan halok bo‘lgan. O‘shanda AQSH prezidenti Jo Bayden mazkur operatsiya vaqtida “dunyo uchun jiddiy terrorchilik xavfi bartaraf etilganini” aytgandi.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)