“Эски таркибдагилар ҳам саҳнага чиқиши мумкин”. Даврон Кабулов “Миллион”нинг юбилей концерти ҳамда саҳна ортидаги муаммолар ҳақида (видео)

Айни кунларда “Миллион” жамоасининг юбилей концерт дастурига тайёргарлик кўраётган Даврон Кабулов “Дарё” журналистига берган интервьюсида соқолга қўйилаётган чекловлар, саҳна орти муаммолари ва бу йилги дастур ҳақида айтиб ўтди.

— “Халқлар дўстлиги” санъат саройи томонидан санъаткорларнинг соқолига қўйилаётган эътирозлар асоссиз деёлмайман. Бетартиб соқол масаласи нафақат санъат саройида, балки кўча-куйда ҳам гапирилмоқда. Тўғри, соқол қўйиш ҳар бир инсоннинг эътиқоди билан боғлиқ масала. Аммо маданият саройи томонидан муайян меъёрлар қўйилган бўлса уларга ҳам амал қилишимиз керак. Ҳар бир даргоҳнинг ўз қонун қоидалари бор. Ҳатто уйимизга келган меҳмон ҳам уйимиздаги қонун-қоидаларга амал қилади. 
“Соқолни фақат диндорлар қўяди”, деган фикрга қўшилмайман. Кўчага чиқиб аҳамият берадиган бўлсак соқол мусулмонда ҳам, христианда ҳам ва яҳудийда ҳам бор. Ҳатто, Тиматининг мухлиси ҳам соқол қўйиши табиий ҳол. Шундан келиб чиққан ҳолда маданият саройи ва бу соҳа раҳбарлари билан келишувга келинади деган умиддаман. Масалан, биз билан хонанда Шоҳруҳхонинг 20 йилдан буён соқоли бор, бу унинг имиджи ҳисобланади. Ҳозир саллани деса каллани олиб келиб, санъаткорларнинг имиджи эканлигига эътибор бермаётган баъзи инсонларнинг ҳаракатида маъно йўқ деб ўйлайман. Кейин соқолга бу даражада сиёсий тус берилишини ҳам хоҳламаган бўлардим, — дейди Даврон Кабулов.

Даврон Кабулов “Миллион” жамоаси сардори эканлигидан ташқари, концертнинг ташкилий ишлари билан ҳам шуғулланади. У нега бу ишни бошқаларга топширмаслигининг сабабини қуйидагича изоҳлади.

— Бошқа инсон сиз нима хоҳлаётганингизни билмайди. Кейин ташкилотчи ижодкордек жон куйдирмаслик эҳтимоли ҳам бор. Аммо келаси концертдан бошлаб қоғозбозлик ишларини бошқа ёрдамчиларга топширишни режа қилдим. Шунда саҳнада кўпроқ ишлашимга имкон бўлади, — дейди Даврон Кабулов.

У “Халқлар дўстлиги” санъат саройининг ижара харажати кескин оширилгани ва харажатларни қоплаш қийин бўлаётгани ҳақида ҳам айтиб ўтди.

— 2021 йил саройнинг бир кунлик ижараси 25 миллион сўм эди. 2022 йилда ижара нархи 40 миллионга оширилди. Ҳозир эса бу нарх 65 миллион сўм этиб белгиланган. Деярли бир ярим йил ичида ижара нархи икки баробардан ҳам кўпроққа оширилди. Аммо ташкилотчилар билетни оширгани йўқ. Агар шундай қиладиган бўлса жабрини оддий халқ тортади. Бир-икки кун концерт берадиган ижодкорлар “мухлисларим билетни амаллаб олишади” деб ўйлашар. Аммо 10 кун концерт берадиган концерт ташкилотчиларида бу жараён жуда қийин кечади. Сарой ижарасидан ташқари, солиқ, декорация, чироқ, овоз кучайтириш ускуналари ва актёрлар гонорарини ҳисоблайдиган бўлсак ташкилотчилар ҳеч қанча фойда қилаётгани йўқ. Менимча, концерт ташкилотчиларига озгина енгиллик бериш керак. Мана ўзбеккиносини обдан тиз чўктириб ачинарли аҳволга олиб келишди ва бугунги кунда томошабинни киносаройларга қайтариш учун миллион-миллион маблағ сарфлашяпти. Концерт томошабинларни ҳам саройлардан узоқлаштирмай, ташкилотчи ва ижодкорларга енгиллик бериш керак.
Яширмайман, фойда тугул зарар билан чиққан концертларимиз ҳам бор. Чунки концерт бериш ҳам бир таваккал, ундан фойда олиш ёки зарар кўришни олдиндан айтиб бўлмайди, — дейди Даврон Кабулов.

Ижодкор бу йилги концертда кимлар иштирок этиши ва тайёргарлик жараёнлари қандай кечаётганини ҳам очиқлади.

— 10 йиллик юбилей концертга жиддий тайёргарлик кўряпмиз. У ҳар галгидан бошқача бўлиши аниқ. Бир сирни очишим мумкин, бир саҳнага 120 дан ортиқ иштирокчи чиқади. Балки эски таркибдаги ижодкорлар ҳам иштирок этишар, — дейди Даврон Кабулов.

Тўлиқ видеони қуйида томоша қилишингиз мумкин.