Futbol bo‘yicha Angliya Premyer Ligasi 26-aprel tunida tom ma’noda o‘zining eng yuqori cho‘qqisiga yetadi. Boisi, turnir yetakchisi bo‘lib turgan, oxirgi paytlarda o‘ziga o‘xshamayroq harakat qilayotgan “Arsenal” safarda, “Etihad” stadionida shiddat bilan uni quvlab kelayotgan, dahshatli formada bo‘lib turgan “Manchester Siti”ga qarshi bahs olib boradi. Quyida ushbu uchrashuvga oid ma’lumotlar va qiziqarli faktlar taqdim etiladi.
“Arsenal” 5 ochko oldinda, lekin “Manchester Siti”ning zaxirasida 2 ta o‘yin bor
21-aprel oqshomi musobaqa jadvaliga o‘z ta’sirini o‘tkazdi. Yetakchi “Arsenal” 20-o‘rindagi “Sauthempton”ga qarshi bahsda 3:3 hisobida durang o‘ynadi. Bu esa “kanonirlar”ning ketma-ket uchinchi durangi edi va ikkinchi o‘rindagi “shaharliklar”ni o‘ziga ancha yaqinlashtirib qo‘ydi. Endi “Arsenal” uchun Manchesterdagi bahsda faqatgina g‘alaba zarur.
“Manchester Siti” esa Angliya Kubogidagi ishtiroki tufayli uik-enddagi turni o‘tkazib yubordi. Pep Gvardiola jamoasi Kubok yarim finalida “Sheffid Yunayted”ni 3:0 hisobida mag‘lub etib, finalga yo‘l oldi. Hal qiluvchi bahsda esa Manchester derbisini ko‘rish mumkin bo‘ladi.
“Manchester Siti”ning qoldirilgan tur o‘yinlari (“Vest Hem” va “Brayton”) keyinroq bo‘lib o‘tadi.
Hozirda “Arsenal”da 75 ochko mavjud, “Manchester Siti”da esa 70 ochko. Manchester klubida ikkita o‘yin zaxirada ekanligini unutmaslik lozim.
“Arsenal”ning g‘alabasidan boshqa istalgan natija “shaharliklar”ga ustunlik taqdim etadi
- Musobaqa yakunida ochkolar teng bo‘lib qolsa, qo‘shimcha natijalarga qaraladi:
- Urilgan va o‘tkazib yuborilgan gollar farqi — hozircha “Siti”da ustunlik (+50 ga +43);
- Urilgan gollar — unda ham “shaharliklar” yetakchi (78 ga 77);
- O‘zaro o‘yinlardagi ochkolar — “Siti” safarda 3:1 hisobida g‘alaba qozongan;
- O‘zaro o‘yinlarda mehmondagi gollar;
- Agar shunda ham tenglik yuzaga kelsa, jamoalar neytral maydonda “Oltin gol” uchun bahslashadi.
Taqvim: “Arsenal” safarda “Nyukasl”ga, o‘z uyida “Brayton”ga qarshi o‘ynaydi, “Man Siti”da esa “Chelsi” bilan o‘yin bor
Londonning “Chelsi” klubi ham chempionlik poygasiga ta’sir qilishi mumkin. “Aristokratlar” ikkala jamoaga qarshi o‘yin o‘tkazadi.
Murabbiylarning o‘yin oldidan fikrlari
Mikel Arteta: “Manchester Siti” ustidan g‘alaba qozonsakgina maqsadga erishishimiz mumkin
“Ha, juda og‘ir oqshom bo‘ladi, lekin bu biz uchun ajoyib imkoniyat.
Boshidanoq Premyer Ligada chempion bo‘lishni xohlasak “Tottenhem” va “Chelsi”ga qarshi safar bahslarini yutishimiz kerakligini bilardik. Bu ishni uddaladik. Endi “Manchester Siti”ga qarshi o‘yinda ham vazifani bajarish lozim.
Chempionlikni xohlasang, ushbu o‘yinlarda zafar quchishing kerak. Barchasi oddiy”.
Pep Gvardiola: “Arsenal” uchun har bir o‘yin finalga teng
“Avvalroq ham aytgandim, agar mavsum oxirrog‘ida bitta o‘yinda yutqazsak ham, barchasi tugaydi. Oktabr yoki noyabr oylarida bunday vaziyatga duch kelsang, bu yomon emas. Ayniqsa, ketma-ket APL chempionligini qo‘lga kiritganingdan keyin.
APLdagi birinchi mavsumimizda har bir o‘yinda finalda maydonga tushayotgandek bo‘lardik. Har bir o‘yin finaldek edi. Buni juda yaxshi eslayman. Hozir “Arsenal”ga qarab xuddi shunday hislarni tuyayotganini sezish mumkin.
Oxirgi oylarda biz nafaqat APL, balki Chempionlar Ligasi va Angliya Kubogida ham o‘yinlar o‘tkazyapmiz.
Hozir vaziyat bizning ham, “Arsenal”ning ham qo‘lida. Agar ular g‘alaba qozonsa, vaziyat nazorati to‘liq ularga o‘tadi. Agar biz yutsak, barchasi o‘zimizga bog‘liq bo‘lib qoladi. Biroq unutmaslik kerak, oldinda hali 7 ta o‘yin bor. Ushbu bahs — muhim, lekin hal qiluvchi emas. Chunki oldinda qiyin o‘yinlar kutib turibdi”.
“Manchester Siti” va “Arsenal” o‘rtasidagi bahs 26 dan 27-aprelga o‘tar kechasi 00:00 da start oladi.
Izoh (0)