O‘zbekistondagi ayrim maktablar, xususan prezident maktablarida ispan tilini o‘qitish yo‘lga qo‘yilishi mumkin.
Xabarga ko‘ra, mamlakatning Madriddagi elchixonasi tashabbusi bilan O‘zbekistonning Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi va Ispaniya Taʼlim va kasbga o‘qitish vazirligi hamda mutasaddilari ishtirokida VKA shaklida uchrashuv tashkil etildi.
Bo‘lib o‘tgan muzokaralarda Ixtisoslashtirilgan taʼlim muassasalari agentligining xalqaro hamkorlik bo‘limi bosh mutaxassisi Akrom Umarxo‘jayev tomonidan prezident, ijod va ixtiososlashtirilgan taʼlim muassasalari faoliyati, joriy qilingan xalqaro standartlarga mos o‘quv jarayonlari va zamonaviy baholash standartlari haqidagi maʼlumotni prezentatsiya shaklida ispan tomoniga so‘zlab berildi.
O‘z navbatida xorij tomoni ispan tilini o‘qitishni O‘zbekistonning ixtisoslashtirilgan taʼlim muassasalarida, xususan, birinchi galda prezident va ijod matkablarida ikki tilli bo‘limlar dasturi, chet tili o‘qituvchilarning yordamchilari dasturi, Ispaniya talim va kasbga o‘qitish vazirligining resurs markazlari faoliyatini joriy qilish orqali hamkorlik aloqalarini yo‘lga qo‘yishni taklif etdi.
Shuningdek, muzokaralar davomida yuqoridagi yo‘nalishlarda hamkorlik aloqalarini yo‘lga qo‘yish masalalarini muhokama qilish maqsadida 24—27-aprel kunlari O‘zbekistonga tashrif buyurishi rejalashtirilgan Ispaniya delegatsiyasi dasturi doirasida Ixtisoslashtirilgan taʼlim muassasalari agentligi rahbariyati bilan muzokaralar olib borish hamda Toshkent va Samarqand shaharlaridagi prezident va ijod maktablariga tashrif buyurish bo‘yicha kelishuvlarga erishildi.
Shuningdek, O‘zbekistondagi maktablarda ispan tilini o‘qitish bo‘yicha dasturlar joriy qilinadi. Ushbu dasturlar joriy qilingan maktablar boshqa taʼlim muassasalariga nisbatan mavqeyi yuqori bo‘lib, iqtidorli o‘quvchilarga milliy shahodatnoma bilan birga Ispaniya shahodatnomasi taqdim etiladi.
Izoh (0)