Канада Сенати ҳисоботи: Мамлакатда исломофобия чуқур илдиз отган

Канадада исломофобия чуқур илдиз отган, мамлакатда диний тоқатсизлик асосида содир этилган жиноятлар сони кўпайган. Бу ҳақда Канада сенати ҳисоботига таяниб, Anadolu хабар берди.

Канада Сенатининг Инсон ҳуқуқлари бўйича қўмитаси мамлакатнинг турли ҳудудларида ҳужум ва ҳақоратларга учраган бир гуруҳ мусулмонлар билан учрашувдан сўнг шундай хулосага келди.

Қўмита аъзолари мамлакатда исломофобия кўринишларининг ўсиш тенденцияларини ўрганиш натижаларини акс эттирувчи ҳисобот тайёрлади. Оммавий фойдаланиш учун ҳисоботнинг бир қисми эълон қилинди, қолгани эса кейинчалик очиқланади.

Ҳисоботда айтилишича, Канадада ўта ўнг ва мусулмонларга нисбатан нафратни намойиш қилувчи гуруҳлар сони ортган. Шунга кўра, диний тоқатсизлик асосида мусулмонларга қарши ҳужумлар сони ошган.

Ҳисобот муаллифларининг таъкидлашича, мамлакатда мусулмонларга нисбатан муросасизлик даражаси бошқа дин вакилларига нисбатан анча юқори. Мусулмонларга қарши воқеалар бошқа диний гуруҳларга қилинган ҳужумлардан кўра зўравонроқдир.

Қўмита раҳбари Салма Атауллахян журналистларга мамлакатда исломофобия тенденциялари кучайганини айтди. Унинг сўзларига кўра, мусулмонларга қарши ҳужумларга кўпинча ёш болалар гувоҳ бўлади, бу уларнинг руҳиятига ёмон таъсир қилади ва кейинги авлодлар ўртасидаги низолар учун замин бўлиши мумкин. 

Таъкидланишича, кўпинча мусулмон аёллар диний тоқатсизлик асосидаги ҳужумларга дучор бўлади. 

“Баъзи аёллар уйдан чиқишга қўрқиб, фарзандларини мактабдан олиб кета олмайди. Кўпчилик тупуриш кўринишидаги ҳақоратга дуч келади. Мусулмонлар кўчада кетаётганда доимо орқасига қарашга мажбур бўлади”, — деди у.

Канада статистикаси томонидан март ойида эълон қилинган ҳисоботга кўра, тўғридан-тўғри полицияга хабар қилинган нафрат билан боғлиқ жиноятлар сони 2021 йилда 2020 йилга нисбатан 27 фоизга ошган, яъни 2,646 дан 3,360 гача.

Мусулмонлар томонидан полицияга билдирилган шикоятлар сони 71 фоизга ўсган. Канадада 1 миллион 775 мингга яқин мусулмон истиқомат қилади.

Атауллахян мусулмонларга қарши ҳужумлар сони бу рақамлардан ошиб кетганини айтмоқда. Бироқ кўплаб жиноятлар ҳақида полицияга хабар берилмайди.