Ким Чен Ин Пхеньян ҳарбий разведка сунъий йўлдошини учиришини эълон қилди

Шимолий Корея етакчиси Ким Чен Ин Пхеньян ҳарбий разведка сунъий йўлдошини учираётганини эълон қилди. Бу ҳақда Жанубий Кореянинг Yonhap агентлиги хабар бермоқда.

Ким Чен Ин аппаратни учиришга тайёргарлик кўриш бўйича комиссия ташкил қилди, дейилади Шимолий Кореянинг марказий телеграф агентлиги хабарида. Ким Чен Ин АҚШ ва Жанубий Кореядан келаётган “таҳдидлар” фонида космик разведка имкониятларига эга бўлиш муҳим эканини таъкидлаган.

14 апрель куни Шимолий Корея биринчи марта “Хвасон-18” қитъалараро баллистик ракетасини учирган эди. Ким Чен Ин бу синов “мамлакатнинг душман ҳужумига ядровий зарба беришга тайёрлигини ошириши” ва “стратегик тийиб турувчи кучлар таркибини тубдан қайта қуриш” имконини беришини таъкидлаган.

Шимолий Корея ракета учирганидан кейин Японияда эвакуация эълон қилинган. Мамлакат хавфсизлик тизими КХДР ракетаси Хоккайдо оролига ёки унинг яқинига тушиши мумкинлигини башорат қилган. Тез орада сигнал бекор қилинди — Токиодагилар прогноз хато чиққанини ва Шимолий Корея ракетаси денгизга қулаганини айтишди.

Шимолий Корея расмийлари ҳам учириш “қўшни давлатлар хавфсизлигига салбий таъсир кўрсатмаган”ини маълум қилди.

“Хвасон-18” учирилганидан кейин Жанубий Корея, АҚШ ва Япония ҳарбийлари Япон денгизида ракетага қарши мудофаа машғулотларини бошлади. Жанубий Корея Ҳарбий-денгиз кучлари вакили тадбирни “Шимолий Кореянинг ядро ва ракета таҳдидларига қарши Жанубий Корея, АҚШ ва Япония ўртасида хавфсизлик соҳасида ҳамкорликни кучайтириш имконияти” деб атади.