“Ишлаб чиқариш давом этаётган Nexia-3 қай йўл билан, кимларга ва қанақа шартларда сотилаётгани жуда қизиқ” — Отабек Бакиров

Nexia-3 автомобилини ишлаб чиқариш март ойида ҳам давом этган. Бироқ мазкур русумдаги машинага шартнома тузиш ярим йил илгари тўхтатилган.

UzAuto Motors 2022 йил якунида Spark ва Nexia ишлаб чиқариш тўхтатилишини, уларнинг ўрнини Chevrolet Tracker ҳамда Onix эгаллашини хабар қилганди.

Статистика агентлиги маълумотларига кўра, жорий йилнинг январь март ойларида 1 минг 843 дона Nexia-3 автомобили ишлаб чиқарилган.

Иқтисодчи Отабек Бакиров Telegramъдаги каналида компания томонидан ишлаб чиқарилиши тўхтамаётган Nexia-3 автомобиллари қай йўл билан, кимларга ва қанақа шартларда сотилаётганига қизиқди.

“Март ойида 1376 дона ёки февралга нисбатан деярли 3 баробар кўп Nexia-3 ишлаб чиқарилган. Бу кўрсаткич бўйича Nexia-3 конвеерга эндигина қўйилган қимматбаҳо ва бойларнинг севимлиси Onix (447 дона) ва Trackerъни (573 дона) ҳам ортда қолдирган.

Onix ва Tracker учун контрактация қилиш мумкин бўлса-да, қора халқ имкониятидаги Nexia-3 учун контрактация ёпилганига 7 ой бўляпти. Ишлаб чиқариш давом этаётган Nexia-3 қай йўл билан, кимларга ва қанақа шартларда сотилаётган жуда қизиқ. Лекин сотувларнинг шаффофлиги масаласига аллақачон қўл силтаб қўйилган кўринади.

Шунчаки маълумот учун, прейскурант нархи 10 минг доллар атрофида бўлган Nexia-3 бозорда энг камида 12,5 минг доллардан пулланмоқда”, – деб ёзган иқтисодчи. 

Отабек Бакиров бундан бир ой аввал ҳам февраль ойида ишлаб чиқарилган автомобиллар кимларга, қай тарзда ва қайси нархларда сотилгани номаълумлигига тўхталганди.

“Ишлаб чиқарилиши тўхтатилиши 7 ойнинг нарида расман эълон қилинган ва охирги захиралар дея сентябргача контрактация дарчаси очилган Nexia-3 автомобили ишлаб чиқарилиши февраль ойида қайта тикланган. Расмий статистикага ишонилса, февралда 467 дона Nexia-3 конвейердан чиққан. Расман бот ва илова орқали Nexia-3 бўйича контрактация тўхтаганига 6 ойдан ошган. Февралда ишлаб чиқарилган автомобиллар кимга ва қай тарзда ва қайси нархларда сотилгани номаълум. Балки, аввал ҳам кўп қўлланилгани сингари дарча механизми орқали “кўрпа остида, ўрага сичқон тушди гулдур гуп” тарзида эгаларини топган бўлиши мумкин. Дарвоқе, ҳукумат истаса, унинг эркатой монополисти исталган миқдордаги исталган камёб автомобилни “шессекундда” топиб беради”, – дея фикр билдирган таҳлилчи.

Шу билан бирга, мутахассис томонидан Ўзбекистонда қўшилган қиймат солиғи 15 фоиздан 12 фоизга пасайса-да, UzAuto Motors автомобиллар нархларини туширмаганига эътибор қаратилган.