Тожикистон Дин ишлари бўйича қўмитаси мамлакатда рамазон ҳайити 21 апрель куни нишонланишини маълум қилди. Бу ҳақда қўмита матбуот хизмати хабар берди.
Маълум қилинишича, рамазон ойи тугаши муносабати билан байрам намози 21 апрель куни республикадаги барча масжидларда маҳаллий вақт билан соат 06:30 да ўқилади. Диндорлар байрамда муҳтожларга ёрдам беришга, исрофгарчилик қилмасликка чақирилмоқда.
Аввалроқ Мусулмонлар идораси Ўзбекистонда рамазон ҳайитини нишонлаш санаси қачон расман эълон қилинишига ойдинлик киритган эди. Жумладан, рамазон ҳайитининг биринчи куни ҳақидаги маълумотлар Уламолар Кенгаши томонидан кўриб чиқилиши ва тегишли хулосалар қабул қилиниши билдирилган.
“Таниқли уламолар ва малакали мутахассислардан иборат мазкур ишчи гуруҳ Рамазон ҳайитининг биринчи куни – Шаввол ҳилолини астрономик таҳлиллар ҳамда хорижий давлатлардаги мутахассислар билан ҳамкорлик асосида кузатишмоқда”, — дейилади Мусулмонлар идораси хабарида.
Изоҳ (0)