Sizda shu paytga qadar allergiya kuzatilmagan bo‘lsa-da, deyarli hamma yerdagi ko‘plab oddiy narsalar juda xavfli bo‘lishi mumkin. Organizm immunitet reaksiyasining kuchayishi (va bu allergiya) har qanday yoshda va istalgan joyda uchrashi ehtimoldan holi emas. Uydagi narsa-buyumlarning qaysilari allergiya xurujini qo‘zg‘atuvchi ekanini bilib oling.
Gilamlar
Uydagi chang eng kuchli allergenlardan biridir. Aniqrog‘i, changning o‘zi immunitet reaksiyasini keltirib chiqarmaydi, balki gilamda yig‘iladigan chang kanalari kasallikka sabab bo‘ladi. Gilamlar esa ularning sevimli yashash joylaridan biridir. Allergiya rivojlanish ehtimolini kamaytirish uchun gilamlaringizni vaqti-vaqti bilan o‘zingiz, maxsus tozalagichlar, ayniqsa, kuchli changyutkichlar bilan yoki tozalash kompaniyasi yordamida chuqur tozalab turing.
Xonaki o‘simliklar
Birinchidan, ba’zi gullarning o‘zi allergen bo‘lishi mumkin. Gul changi va barglari, o‘simlikning ko‘zga ko‘rinmaydigan mayda zarralari ham allergiya qo‘zg‘atadi. Ikkinchidan, gul tuvaklarda, tuproq yuzasida va so‘lib qolgan barg yoki poyalarda kuchli allergen — mog‘or paydo bo‘ladi. Birinchi navbatda o‘simlik haqidagi ma’lumotlarni diqqat bilan o‘rganishni va potensial allergenlarni sotib olmaslikni maslahat beramiz. Shuningdek, qurib qolgan gullar, barg va poyalarni o‘z vaqtida kesib, tuproq va gul tuvakni toza saqlang.
Konditsioner
Allergiya bilan og‘rigan odamlarga uylariga konditsioner o‘rnatish tavsiya etiladi, chunki bu qurilmalar xonada nafaqat qulay haroratni saqlashga, balki havoni filtrlashga, uni chang zarralari va allergenlardan tozalashga yordam beradi. Ammo vaqt o‘tishi bilan konditsionerning o‘zi allergenlarning katta omboriga aylanadi, ularning zarralari qurilma filtrlariga joylashadi va xonaga qayta “puflanadi”. Yiliga kamida bir marta konditsioner filtrlarini tozalash muhim, bu uning uzoqroq ishlashiga imkon beribgina qolmay sog‘lig‘ingizni ham himoya qiladi.
Yumshoq o‘yinchoqlar
Ularni ba’zan “chang yig‘uvchilar” deb atashadi. Qolaversa, chang kanalari yumshoq o‘yinchoqlarni nihoyatda yaxshi ko‘radi va ko‘pincha ular o‘yinchoqni bitta ulkan allergenga aylantiradilar. Ushbu bombani “zararsizlantirish” uchun o‘yinchoqlarni yiliga kamida ikki marta yuvish kerak.
Kitoblar
Kutubxona, kitoblardagi chang maishiy changdan ham zararlidir: birinchidan, kanalar, ikkinchidan, kuchli allergen bo‘lgan bosma siyoh va yelim zarralari tufayli xavf omili ortadi. Kitob javonlaringizni kamida oyiga bir marta changyutkich bilan tozalashni unutmang!
Choyshab va matraslar
Uyimizdagi eng kir tez to‘planadigan joylardan biri — bu yotoqxonadir. Issiq va nam muhit bakteriya va mikroblarning rivojlanishi uchun ideal, matras va adyol esa chang kanalari to‘planadigan haqiqiy shohona muhitdir. Xavfni kamaytirish uchun birinchi navbatda choyshabni har kuni silkitib, to‘shakka yotishdan tayyorlashdan oldin uni shamollatib yuboring. Ikkinchidan, choyshabingizni tez-tez o‘zgartiring, ko‘rpa va adyolingizni muntazam ravishda kimyoviy tozalash va vaqti-vaqti bilan matrasni obdan tozalashni amalga oshirib turing.
Yuvinish xonasining parda va gilamchasi
Hammomdagi mikro iqlim har doim xonadonning qolgan qismiga qaraganda issiqroq va namroq bo‘ladi. Shuning uchun bu joyda mog‘or tez-tez paydo bo‘ladi. Mog‘or juda oz miqdorda, ko‘zga ko‘rinmas bo‘lsa ham u kuchli allergiyaga olib kelishi mumkin. Shu sababli dush pardalari, gilamchalar va suv to‘planadigan boshqa kichik narsalarni o‘zgartirib turish lozim. Devor, shift va karnizlar — maxsus antibakterial vositalar bilan muntazam tozalanishi kerak.
Izoh (0)