Toshkentda bolakay bolalar maydonchasida hosil bo‘lgan chuqurga tushib ketdi

Toshkentning Mirzo Ulug‘bek tumanida yosh bola bolalar maydonchasida hosil bo‘lgan chuqurga tushib ketdi.

Tuman hokimligi xabariga ko‘ra, 14-aprel kuni “Habib Abdullayev” MFY hududidagi bolalar maydonchasida yog‘ingarchilik oqibatida sunʼiy qoplamalar ostida chuqurliklar hosil bo‘lgan.

Buning oqibatida tuproq va tosh qorishmalari yemirilib tushgan. Bolalar maydonchasida yurgan bola A.A. ushbu chuqurchaga tushib ketgan.

Qayd etilishicha, ayni paytda bola sog‘-salomat, xavotirga o‘rin yo‘q. Maydonchadagi chuqurlik to‘g‘rilangan bo‘lib, bolalar xavotirsiz o‘yingohdan foydalanishi mumkin.

13-aprel kuni 6 yoshli bola Mirzo Ulug‘bek tumani Parkent ko‘chasida suv tarmoqlari bo‘limi tomonidan qazilgan chuqurga tushib ketgandi.