Наманган шаҳар тиббиёт бирлашмаси масъул ходимларидан бири ички ишлар идораларига мурожаат қилиб, номаълум шахс томонидан пластик картасидан 2 миллион сўм ечиб олинганини билдирган ва чора кўришни сўраган. Бу ҳақда “Дарё” мухбири Азизбек Абдувалиев хабар бермоқда.
Вилоят ИИБ Киберхавфсизлик бўлими ходимлари ва ЖҚБ тезкор вакиллари томонидан олиб борилган суриштирувлар давомида ушбу жиноятни Наманган шаҳридаги мактаблардан бирининг 9-синф ўқувчиси содир этганлиги аниқланди. Ундан далилий ашё сифатида ўзлаштирилган пуллар ўтказилган 2 дона пластик карта олинган.
Маълум бўлишича, ўқувчи тиббиёт бирлашмаси ходимининг иш фаолиятида ёрдамлашиш учун унинг олдига келиб турган. Устози сафарга кетганида эса унинг хонасидаги компьютерга ўрнатилган Click мобил иловаси орқали жабрланувчига тегишли пулларни онаси ва дўстининг пластик карталарига ўтказиб юборган.
Вилоят ИИБ матбуот хизматининг қайд этишича, ушбу ҳолат юзасидан жиноят иши қўзғатилган ва дастлабки тергов ҳаракатлари олиб борилмоқда.
Изоҳ (0)