Belarus prezidenti Aleksandr Lukashenko Mustaqil Davlatlar Hamdo‘stligidagi hamkorlariga sud tizimini muvofiqlashtirilgan tarzda o‘zgartirishni taklif qildi. Minsk barcha konstruktiv takliflarni qo‘llab-quvvatlashga tayyor, dedi u MDH davlatlarining Oliy sudlari rahbarlari bilan uchrashuvda.
“Sizning Minskka bu galgi tashrifingiz professional hamkorlikni yanada rivojlantirishga xizmat qiladi, deb o‘ylayman. Biz sud-huquq faoliyati sohasida ko‘plab o‘zgarishlarni bir vaqtda va kelishilgan holda amalga oshirishimiz mumkin. Mamlakatimiz muloqot uchun doimo ochiq. Agar siz uchun davlat ichida va davlatlararo miqyosda biror ish qilish zarur bo‘lsa, biz barcha konstruktiv takliflaringizni qo‘llab-quvvatlashga va amalga oshirishga tayyormiz”, — dedi u.
Lukashenko MDH davlatlari hamkorlikni mustahkamlash borasida allaqachon to‘g‘ri qadam tashlaganini eslatdi. Xususan, Belarus Oliy sudi tashabbusi bilan MDH davlatlari Oliy sudlari raislari kengashi tuzilgan. Lukashenkoning fikricha, bu adliya sohasidagi yondashuvlarni muvofiqlashtirish imkonini beradi.
Xorijiy delegatsiyalar Belarus Oliy sudining 100 yilligi nishonlanishi munosabati bilan Minskda bo‘lib turibdi. Ular orasida Rossiya, Ozarbayjon, Tojikiston, Qozog‘iston, Qirg‘iziston va O‘zbekiston vakillari bor.
Izoh (0)