Беларусь президенти Александр Лукашенко Мустақил Давлатлар Ҳамдўстлигидаги ҳамкорларига суд тизимини мувофиқлаштирилган тарзда ўзгартиришни таклиф қилди. Минск барча конструктив таклифларни қўллаб-қувватлашга тайёр, деди у МДҲ давлатларининг Олий судлари раҳбарлари билан учрашувда.
“Сизнинг Минскка бу галги ташрифингиз профессионал ҳамкорликни янада ривожлантиришга хизмат қилади, деб ўйлайман. Биз суд-ҳуқуқ фаолияти соҳасида кўплаб ўзгаришларни бир вақтда ва келишилган ҳолда амалга оширишимиз мумкин. Мамлакатимиз мулоқот учун доимо очиқ. Агар сиз учун давлат ичида ва давлатлараро миқёсда бирор иш қилиш зарур бўлса, биз барча конструктив таклифларингизни қўллаб-қувватлашга ва амалга оширишга тайёрмиз”, — деди у.
Лукашенко МДҲ давлатлари ҳамкорликни мустаҳкамлаш борасида аллақачон тўғри қадам ташлаганини эслатди. Хусусан, Беларусь Олий суди ташаббуси билан МДҲ давлатлари Олий судлари раислари кенгаши тузилган. Лукашенконинг фикрича, бу адлия соҳасидаги ёндашувларни мувофиқлаштириш имконини беради.
Хорижий делегациялар Беларусь Олий судининг 100 йиллиги нишонланиши муносабати билан Минскда бўлиб турибди. Улар орасида Россия, Озарбайжон, Тожикистон, Қозоғистон, Қирғизистон ва Ўзбекистон вакиллари бор.
Изоҳ (0)