Sobiq “Jonim” guruhi xonandasi Aziza Nasriddinova YouTube’ning “Nozim Tolipov” kanaliga bergan intervyusida hayotidagi eng og‘riqli nuqtalar haqida so‘zlab berdi. Xususan, guruh tarqalishiga Shahzoda sababchi bo‘lgani, ijodiy taqiq qo‘yishgani va shundan keyin Rossiyaga borib oshpazlik qilishga majbur bo‘lgani haqida gapirdi.
— Ijodimni ancha erta 7 yoshimdan boshlaganman. “Paxtaoy” guruhi bilan ko‘plab xalqaro tanlov va festivallarda ishtirok etganman. Vagif Zokirov bilan birga ijod qilardik. Xususan Shahzoda bilan tanishishimga ham u sababchi bo‘lgan. Ya’ni Shahzoda uning turmush o‘rtog‘i bilan sinfdosh dugona bo‘lgan. Men Vagif Zokirovning uyiga repititsiya qilish uchun borganimda, u guruh tuzish taklifini bergan. Vagifning taklifidan hayron bo‘lib kim bilan guruh tuzamiz deganimda Natella va Zilolani aytgan. “Guruh tuzish menga kerakmi yo‘qmi” deb ancha ikkilanganman. Keyin mayli kerakdir deb rozi bo‘lganman. Natella Vagifning ayoli edi, u oranjirovka uchun pul to‘lamasdi, asosiy harajatlarni esa men qoplaganman. Zilola Musayevaning onasi ham unga pul masalasida yordam bergan. Xullas, “Jonim” guruhining qo‘shiqlarini o‘z pulimiz evaziga yaratganmiz. “Tarona rekords”dan umuman yordam olmaganmiz. U faqatgina kasseta, konsert va radioda qo‘shiqlarimiz berib borilishiga yordam berishgan. U paytda san’atkorlar ancha kam edi. Kim yaxshi qo‘shiq yaratsa, klipsiz ham mashhurlikka erishish mumkin edi. 2000-yil “Tarona taqdimoti”da “O‘tib ketadi” qo‘shig‘i bilan sahnaga chiqqanmiz. Aslida guruh nomi ham prodyusserlik kompaniyasiga tegishli emas. Bu nomli Vagif Zokirov qo‘ygan, — deydi xonanda Aziza Nasriddinova.
Xonanda guruhning tarqatilishi unga og‘ir zarba bo‘lgani, o‘z qo‘shiqlarini kuylashdan mahrum etilgani haqida gapirib o‘tdi.
— Guruhning tarqatilishiga Zilola Musayeva sababchi bo‘lgan. “Qarama ko‘zlarimga” qo‘shig‘i “hit” bo‘lganidan keyin 2001-yilning 1-yanvar kuni bir dugonam qo‘ng‘iroq qilib “Tinchlikmi? Nega bunday qilayapsan? Taniqli guruh bo‘lgandi-ku” deb so‘ragan. Keyin bilsam ular radioga yakkaxon xonanda bo‘lib guruhni tark etganim haqida intervyu berishgan ekan. Bu xabarni eshitib “shok” holatiga tushdim. Buning sababini so‘rasam kulib “Bu hayot” deb javob berishgan. U paytlari yosh qiz edim, shartnomani aniq o‘qimay qo‘l qo‘yganman. Xullas, guruhning barcha muallif qo‘shiqlari, nomi kompaniyaga tegishli degan bandi bor ekan. “Ahir qo‘shiqlarning yaratilishiga pulni men tikkanman-ku”, deb so‘raganimda “Bu hayot”, deb kulib javob berishgan.
To‘g‘ri tushunaman, prodyusserlik kompaniyalari iste’dodli bo‘lgan xonandalarga pul tikadi, shu orqali foyda oladi. Ziyoda, Oybek Nigora, “Bojalar” ham prodyusserlik kompaniyasi orqali “ko‘tarilishgan”. Ammo shartnoma muddati tugagach, qo‘shiq, klip va sahna liboslari ham ularning o‘zida qolgan. Mana bu haqiqiy mardlik. Bizda esa hamma narsani o‘zlarida olib qolib, qo‘pol qilib aytganda yalong‘och haydab solishgan. O‘z pulim evaziga yaratilgan qo‘shiqlarni ham aytish huquqidan mahrum qilishdi. “Aytsang jarima to‘laysan”, deyishganidan keyin juda yomon ahvolga tushganman.
“Jonim” guruhidan keyin ikkita albom yozdim. Ammo ularni ommaga chiqarish imkoni bo‘lmadi. “Nega ishlamagansiz, qo‘shiqlaringizni eshitmaganmiz”, deb ko‘p so‘rashadi. Hamma yerga “zapret” qo‘yishganidan keyin qanday qilib ishlayman. Shoira Otabekova va “Setora” guruhi ham xuddi shunday vaziyatga tushgan.
Mana shu voqeadan keyin 3-4 oy o‘zimga kelolmay, ko‘chaga ham chiqmay qo‘ydim. Shu vaziyatda bastakor Shahnozning yordami katta bo‘ldi. Ichimdagi dardlarim asosida qo‘shiqlar yaratib berdi.
O‘sha vaziyatda konsert yoki radioga borsam “Uzr, sizni chiqarolmaymiz, ishdan ketgimiz kelmayapti”, deb tushuntirishadi. Litsenziya bor, qo‘shiq bor va ommaga chiqishga ruxsat bo‘lmagan, — deydi xonanda Aziza Nasriddinova.
Xonanda Shahzoda bilan tanishganida u oddiy qiz bo‘lgani va keyinchalik birdan o‘zgarib ketgani haqida ham aytib o‘tdi.
— Shahzoda bilan tanishganimda u oddiy, hech narsasi yo‘q qiz edi. U o‘sha paytda Farg‘onadan endi Toshkentga kelgandi. Boshida biz unga anchagina yordam berganmiz. Kiyim-kechakdan opasi yordam qilgandi. “Ko‘rmaganning ko‘rgani qursin” deb bekorga aytishmas ekan. U uchun pul birinchi o‘rinda bo‘lib qoldi. O‘zining maqsadiga yetdi. Shahzoda tanlagan yo‘l bilan ijod qilishni tasavvur qilolmayman. Har bir insonning o‘z yo‘li bor. Men ozod inson bo‘lishni, yarim kechasi soat 1-2 da qo‘ng‘iroq qilib “Falon joyga borib qo‘shiq ayt” deyishlarini hazm qilolmayman, — deydi xonanda.
Aziza Nasriddinova taqiqlarga uchragach, Rossiyaga borib oshpazlik qilishga majbur bo‘lgani haqida ham so‘zlab berdi.
— Ba’zi insonlar bunday vaziyatda tushkunlikka tushib, sinib qolishadi. Men esa qizlarim uchun ham o‘zimni qo‘lga oldim. Yashirmayman, oshpazlik bo‘yicha o‘qib, Rossiyadagi restoranda ham ishlaganman. U yerda ham tanib, nega bunday ish qilayotganimni ko‘p so‘rashardi. Undan keyin shiftga oyna yoki plastmasga gul tushirishni ham o‘rganganman. Hozir ham ovqat tayyorlash, qandolatchilik bilan shug‘ullanish qo‘limdan keladi. Undan keyin ikki yil bankda ishladim. Hozir moddiy ahvolimiz ancha yaxshilangan. Onam katta yoshga kirgan bo‘lsa-da, haligacha ishlaydi. U iqtisod fanlari bo‘yicha professor, katta qizim esa blogerlik bilan shug‘ullanyapti. Xullas, uchchalamiz topgan pulimizni bir yerga jamg‘arib yashab kelyapmiz, — deydi xonanda.
Eslatib o‘tamiz, “Jonim” guruhi 1999-yilda tashkil topgan. Aziza Nasriddinova guruhdan ketgach, o‘rnini Natella egallaydi. 2001-yili guruhni Shahzoda ham tark etib, yakkaxon ijodini boshlaydi. Guruh ijrosidagi “O‘tib ketadi” va “Qarama ko‘zlarimga” qo‘shiqlari “hit” darajaga erishgan.
Izoh (0)