Korrupsiyaga qarshi kurashish agentligi xodimlari tomonidan 2023-yilga qadar xizmat safarlari, xalqaro va boshqa rasmiy tadbirlar munosabati bilan qabul qilingan sovg‘alar bo‘yicha Sovg‘alar reyestrini shakllantirildi.
Reyestrda keltirilgan ma’lumotlarga ko‘ra, shu vaqtgacha qiymati 14,57 million so‘mlik 8 ta sovg‘a agentlikka hadya qilingan. Ularning barchasini agentlik direktori Akmal Burhonov qabul qilgan.
Ulardan to‘rttasi stol ustiga qo‘yiladigan suvenir bo‘lsa, yana to‘rttasi devorga osiladigan rasmdir. Sovg‘alarning eng qimmati Misr Ma’muriy nazorat idorasidan yuborilgan stol ustiga qo‘yiladigan suvenir bo‘lib, uning qiymati 3,2 million so‘mni tashkil etadi. Afg‘oniston Korrupsiyaga qarshi kurashish komissiyasining suveniri qiymati bo‘lsa 1,35 million so‘mga baholangan.
Devorga osiladigan rasmlarni esa Ozarbayjon Korrupsiyaga qarshi kurashish bosh boshqarmasi (1,4 mln so‘m), Qozog‘iston Korrupsiyaga qarshi kurashish agentligi direktori (1,45 million so‘m), Tojikiston Davlat moliyaviy nazorati va korrupsiyaga qarshi kurashish agentligi (1,6 million so‘m va 2,5 million so‘m) yuborgan.
“Sovg‘alarning savdo cheklari yoki qiymati haqidagi boshqa ma’lumotlari yo‘qligi sababli ularning narxlari bozor va internet ma’lumotlari asosida o‘rganib chiqilgan hamda shu asosda baholangan”, — deydi agentlik xodimi Feruza Mirzakomilova.
Mart o‘rtalarida Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin bo‘lgan sovg‘a qiymati, shuningdek, uni tasarruf etish tartibi to‘g‘risidagi nizom Adliya vazirligida davlat ro‘yxatidan o‘tkazilgan edi. Nizomga ko‘ra, Davlat fuqarolik xizmatchisi oladigan sovg‘a quyidagi talablarga javob berishi kerak:
- milliy qonunchilikda taqiqlanmagan ashyolar bo‘lishi;
- sovg‘a xalqaro va boshqa rasmiy tadbirda ixtiyoriy berilgan bo‘lishi;
- sovg‘a ochiq va oshkora qabul qilinishi;
- davlat organining obro‘siga putur yetkazmasligi;
- manfaatlar to‘qnashuvi yoki korrupsiyaviy omilni keltirib chiqarmasligi.
Davlat fuqarolik xizmatchisi sovg‘ani tadbirdan kelgandan so‘ng 3 ish kunida xo‘jalik bo‘limiga beradi va bunda dalolatnoma tuziladi. Sovg‘aning qiymati aniq bo‘lmasa, xo‘jalik bo‘limi uni baholaydi va uning qiymati BHMning 4 baravaridan (1,2 million so‘mdan) ko‘p bo‘lmasa, sovg‘a davlat fuqarolik xizmatchisiga beriladi.
Sovg‘a qiymati BHMning 4 baravaridan ko‘p bo‘lsa, u moliya-iqtisod bo‘linmasi tomonidan davlat organi balansiga kirim qilinadi hamda davlat organi ehtiyoji uchun foydalaniladi.
Tez yaroqsiz holga keluvchi sovg‘alar (gul, shirinliklar), shuningdek, kanselyariya to‘plamlari (taqvim, buklet, plastmassali ruchka, kundalik va bloknot) sovg‘a sifatida rasmiylashtirilmaydi hamda ushbu sovg‘alar davlat fuqarolik xizmatchisida qoldiriladi. Mazkur nizom talablari barcha davlat fuqarolik xizmatchilari uchun majburiy hisoblanadi.
Izoh (0)