O‘zbekiston bog‘chalarida referendum targ‘iboti o‘tkazilmasligi belgilandi

O‘zbekiston bog‘chalarida referendum targ‘iboti o‘tkazilmasligi belgilandi. Bu haqda Maktabgacha ta’lim agentligi xabar berdi.

9-aprel kuni maktabgacha ta’lim tashkilotida “Konstitutsiya meniki, seniki, bizniki! Konstitutsiya o‘zimizniki” shiori ostida tarbiyalanuvchilarga jo‘r bo‘lib ayttirilgan video ijtimoiy tarmoqlarda tarqaldi.

Mazkur videoda maktabgacha ta’lim tashkiloti xodimi tomonidan referendum doirasida o‘tkazilayotgan tashviqot tadbirlaridan ruhlanib, tarbiyalanuvchilarga tushuncha berishga uringanlik holatini kuzatish mumkin. 

“Ushbu holat yuzasidan respublikadagi barcha maktabgacha ta’lim sohasidagi hudud vakillariga ogohlantirishlar berilib, bu kabi holatlarni oldini olish bo‘yicha tavsiyalar berildi”, — deyiladi Maktabgacha ta’lim agentligi xabarida.