Xitoyda tovuqlarni qo‘rqitib o‘ldirgan erkak qamoqqa tashlandi

Xitoyda qo‘shnisining 1100 ta tovug‘ini fonar bilan qo‘rqitib o‘ldirgan erkak 6 oylik qamoq jazosiga hukm qilindi. Bu haqda CNN xabar berdi.

Sud ishida Gu familiyali erkak qo‘shnisiga tegishli tovuqlarni qo‘rqitib o‘ldirishda aybdor deb topilgan. Qo‘shnilar o‘rtasida 2022-yil aprel oyida tortishuv yuzaga kelgan, jumladan, Guning daraxtlari qo‘shnisi Chjun tomonidan ruxsatsiz kesib tashlagan. Xunan provinsiyasidagi Xenyan okrug sudi Gu o‘ch olganini, xususan, tunda Chjunning parrandachilik fermasiga bir necha marta yashirincha kirganini aniqlagan.

Gu ishlatgan fonar tovuqlarda vahima qo‘zg‘atgan va ular burchakka qochganlarida tiqilinchda qolib nobud bo‘lgan. Gu qo‘shnisining hududiga birinchi marta bostirib kirganida, 500 ta tovuq halok bo‘lgan. Shundan so‘ng u politsiya tomonidan hibsga olingan va 3000 yuan (437 dollar) miqdorida tovon puli to‘lashga majbur qilingan. Ammo Gu bu bilan to‘xtab qolmay, ikkinchi marta qo‘shnisining 640 ta tovug‘ini nobud qilgan.

Xenyan sudi Gu qo‘shnisiga qasddan “mulkiy zarar” yetkazgan degan qarorga kelgan. Xitoy rasmiylari 1100 ta nobud bo‘lgan tovuqning narxini 13 840 yuanga (taxminan 2000 dollar) baholagan. Sud Guni olti oyga qamoq jazosiga hukm qilgan.