Fulvio Martushello boshchiligidagi Yevroparlamentning besh deputatidan iborat Markaziy Osiyo bilan aloqalar bo‘yicha delegatsiya 2023-yil 3 va 5-aprel kunlari O‘zbekistonga tashrif buyuradi.
Yevroittifoq saytida bu tashrif Rossiyaning Ukrainaga qarshi urushi, O‘zbekistonda bo‘lajak Konstitutsiyaviy referendum hamda Kengaytirilgan sheriklik hamda hamkorlik to‘g‘risidagi Bitimning imzolanishi munosabati bilan ikki tomonlama munosabatlar uchun muhim pallada bo‘lib o‘tayotgani keltirilgan.
Delegatsiya O‘zbekiston Oliy Majlisi bilan birgalikda Toshkent shahrida “Yevropa Ittifoqi – O‘zbekiston” parlament hamkorligi qo‘mitasining 16-yig‘ilishini o‘tkazadi, shuningdek, hukumat vakillari bilan uchrashadi.
Bundan tashqari, Yevroparlament delegatsiyasi Qoraqalpog‘istondagi mavjud vaziyatni, jumladan 2022-yil iyul voqealaridan keyingi, shuningdek, Orol dengizning qurishi natijasida yuzaga kelgan ekologik ofat bilan bog‘liq vaziyatni baholash uchun Nukus va Mo‘ynoq shaharlariga boradi.
Shuningdek, Yevroparlament delegatsiyasi demokratik islohotlarni qo‘llab-quvvatlash, qonun ustuvorligi, inson huquqlari va oshkoralikni ta’minlashni qo‘llab-quvvatlash bo‘yicha murojaat qiladi.
Izoh (0)