Yo‘llardagi tirbandliklarda iftorlik tarqatib yurgan ko‘ngillilar — suratlarda

Toshkentda “Sen dunyoga keraksan” ko‘ngillilar jamoasi 30-martdan boshlab “Yo‘lda iftorlik” nomli aksiyani yo‘lga qo‘ydi. Unda jamoa vakillari shaharning tirband yo‘llarida yurib ro‘za tutganlarga iftorlik uchun suv va xurmo tarqatadi. “Daryo” ushbu aksiyaning bir kunidan fotoreportaj tayyorladi.

Jamoa vakilining “Daryo” muxbiriga maʼlum qilishicha, aksiya 10 kun davom etib, shuncha muddatga mo‘ljallab 12 ming dona suv va xurmo sotib olingan. Ushbu yeguliklar uchun mablag‘ esa jamoaning ijtimoiy tarmoqlardagi sahifalarida keltirilgan bank kartalaridagi ehsonlar evaziga yig‘ilgan. “Sen dunyoga keraksan” taxminan 40 dan ortiq aʼzodan iborat bo‘lib, ular guruhlarga bo‘lingan holda suv va xurmolarni tashib keltirib, alohida qadoqlab, iftorlikka tarqatgunga qadar navbatma-navbat ishlaydi.

Aksiyaga qo‘shilish uchun aynan jamoa aʼzosi bo‘lish shart emas, har qanday istovchi va talabgor ular bilan birgalikda yo‘lovchilarga iftorlik tarqatishi mumkin.