Ukrainaning yetakchi farmatsevtika kompaniyasi “Yuria-farm” O‘zbekistondagi “Reka-Med” farmatsevtika kompaniyasini Yevropa tiklanish va taraqqiyot banki (YTTB) tomonidan ajratilgan mavjud kredit hisobidan qayta yo‘naltirilgan 10 million yevro mablag‘ evaziga sotib oldi. Bu haqda bank matbuot xizmati xabar bermoqda.
YTTB krediti mahsulotining 30 foizini (shundan 15 foizi O‘zbekistonga eksport qilinadi) eksport qiluvchi “Yuria-farm” kompaniyasiga O‘zbekiston bozori uchun mahalliy farmatsevtika mahsulotlarini ishlab chiqarish imkonini beradi.
“Yuria-farm” o‘z mahsulotlarini Ukraina bo‘ylab sotadi va 40 dan ortiq mamlakatlarga eksport qiladi.
YTTBga ko‘ra, mahalliy ishlab chiqarish uchun o‘zbek kompaniyasini sotib olish Rossiyaning Ukrainaga qarshi urushi nuqtai nazaridan eng yaxshi strategik javob bo‘ldi.
“Ushbu tranzaksiya Ukrainada ham, O‘zbekistonda ham dori vositalarining mavjudligi va arzonligini oshiradi. Bu, shuningdek, “Yuria-farm” rentabelligini oshiradi va kompaniyani yanada raqobatbardosh qilish uchun transchegaraviy sotib olish, uning faoliyatini xalqarolashtirishni qo‘llab-quvvatlaydi”, — deydi YTTBning Sharqiy Yevropa va Kavkaz bo‘yicha boshqaruvchi direktori Matteo Patrone.
“Yuria-farm”ning asosiy operatsion bo‘linmasi, retsept bo‘yicha dori-darmonlar va tibbiy asboblar ishlab chiqaruvchi MChJ Yuria-farm 2019-yilning may oyida YTTB bilan dastlabki kredit shartnomasini imzolagan.
Kompaniya o‘shanda ikki bosqichda 25 mln yevro qarz olishi reja qilingan. Birinchi bosqichda energiya samaradorligini oshirish, saraton kasalligini davolash uchun moslashtirilgan arzon dozalarni joriy etish uchun 15 mln yevro ajratilgandi.
Ikkinchi bosqichda kompaniyaga ishlab chiqarishni yaxshilash uchun 10 mln yevro ajratilishi kerak edi. Biroq, bu mablag‘ “Reka-med”ni sotib olishga yo‘naltirildi.
“Reka-med” O‘zbekistonda 2006-yilda Rossiya va Buyuk Britaniya bilan qo‘shma korxona sifatida tashkil qilingan. 31-mart holatiga ko‘ra, kompaniya ta’sischilari 95,2 foiz ulush bilan Emiko Holding va 4,8 foiz ulush bilan Mahbuba Mamanova hisoblanadi.
Izoh (0)