Bir necha kun avval Surxondaryo viloyati fermerlari ertagi qishki piyoz hosilini yig‘ib olishga kirishdi.
EastFruit mutaxassislarining qayd etishicha, ushbu mahsulotning bir necha tonnalik dastlabki kichik partiyalari mazkur viloyat va qo‘shni viloyatlar bozorlariga jo‘natilmoqda.
Mamlakatning ulgurji bozorlariga ushbu mahsulotning yirik partiyalari qachon kirib keladi va piyozining yangi hosili eksporti qachon boshlanadi?
“Vesagro” konsalting kompaniyasi rahbari O‘rmonali Usmonovning fikriga ko‘ra, yangi hosil piyozining yirik partiyalarini taxminan bir hafta yoki o‘n kun ichida shakllantirish mumkin bo‘ladi.
Biroq, hozircha yangi hosil piyozining pishib yetilish darajasi bu mahsulotni uzoq masofalarga tashishga imkon bermaydi.
Ekspertning qayd etishicha, eksportga yaroqli pishib yetilish darajasiga ega yangi hosil piyozining yirik partiyalari ichki bozorga joriy yilning aprel oyi o‘rtalarida yoki undan keyin chiqadi.
Ma’lum bo‘lishicha, Surxondaryo viloyatining uch tumani (Jarqo‘rg‘on, Qumqo‘rg‘on va Sherobod tumanlari) fermerlari ertagi qishki piyoz (avgust piyozi) hosilini yig‘ib olishga kirishgan.
Ulgurji yirik partiyalar ichki bozorda hali mavjud emas va bu mahsulotning kichik hajmlari mahalliy hududiy bozorlarga jo‘natilmoqda.
“Bilishimcha, mamlakat poytaxtidagi ulgurji bozorlarga ushbu mahsulotning yirik partiyalari hali kirib bormagan. Qulay ob-havo sharoitida, taxminan bir hafta yoki o‘n kun ichida yirik partiyalarni shakllantirish mumkin bo‘ladi va ehtimol, o‘shanda mamlakatning ulgurji bozorlarida yangi hosil piyozi katta hajmlarda taklif qilina boshlanadi. Mening hisob-kitoblarimga ko‘ra, joriy yilning 15—20-aprel kunlari eksportga yaroqli sifatga ega yangi hosil piyozining yirik partiyalari mamlakat ichki bozoriga chiqa boshlaydi”, — deydi O‘rmanali Usmonov.
Avval xabar berilganidek, yanvardagi anomal sovuq “avgust piyozi” barglarini butunlay nobud qildi.
Yangi barglar unib chiqishi va ularning rivojlanishi uchun yana vaqt kerak bo‘ldi va bu, o‘z navbatida, piyozning pishib yetilish muddatini taxminan 10-15 kunga surib yubordi.
Tabiiyki, 2023-yilning bahorida ertagi piyoz hosilining yig‘im-terimi boshlanishi ham shu muddatga kechikdi.
O‘zbekiston Markaziy Osiyoda eng yirik piyoz eksportyori hisoblanadi, respublika yiliga 200 ming tonnadan ortiq piyoz eksport qiladi.
2023-yilning mart oyi o‘rtalarida O‘zbekistonda piyoz eksportiga o‘rnatilgan vaqtinchalik cheklovlar bekor qilindi.
Izoh (0)