“Россияга қарши энг яхши стратегик жавоб”: Украина фармацевтика компанияси Ўзбекистондаги “Река-Мед”ни сотиб олди
Украинанинг етакчи фармацевтика компанияси “Юриа-фарм” Ўзбекистондаги “Река-Мед” фармацевтика компаниясини Европа тикланиш ва тараққиёт банки (ЕТТБ) томонидан ажратилган мавжуд кредит ҳисобидан қайта йўналтирилган 10 миллион евро маблағ эвазига сотиб олди. Бу ҳақда банк матбуот хизмати хабар бермоқда.
ЕТТБ кредити маҳсулотининг 30 фоизини (шундан 15 фоизи Ўзбекистонга экспорт қилинади) экспорт қилувчи “Юриа-фарм” компаниясига Ўзбекистон бозори учун маҳаллий фармацевтика маҳсулотларини ишлаб чиқариш имконини беради.
“Юриа-фарм” ўз маҳсулотларини Украина бўйлаб сотади ва 40 дан ортиқ мамлакатларга экспорт қилади.
ЕТТБга кўра, маҳаллий ишлаб чиқариш учун ўзбек компаниясини сотиб олиш Россиянинг Украинага қарши уруши нуқтаи назаридан энг яхши стратегик жавоб бўлди.
“Ушбу транзакция Украинада ҳам, Ўзбекистонда ҳам дори воситаларининг мавжудлиги ва арзонлигини оширади. Бу, шунингдек, “Юриа-фарм” рентабеллигини оширади ва компанияни янада рақобатбардош қилиш учун трансчегаравий сотиб олиш, унинг фаолиятини халқаролаштиришни қўллаб-қувватлайди”, — дейди ЕТТБнинг Шарқий Европа ва Кавказ бўйича бошқарувчи директори Matteо Патроне.
“Юриа-фарм”нинг асосий операцион бўлинмаси, рецепт бўйича дори-дармонлар ва тиббий асбоблар ишлаб чиқарувчи МЧЖ Юриа-фарм 2019 йилнинг май ойида ЕТТБ билан дастлабки кредит шартномасини имзолаган.
Компания ўшанда икки босқичда 25 млн евро қарз олиши режа қилинган. Биринчи босқичда энергия самарадорлигини ошириш, саратон касаллигини даволаш учун мослаштирилган арзон дозаларни жорий этиш учун 15 млн евро ажратилганди.
Иккинчи босқичда компанияга ишлаб чиқаришни яхшилаш учун 10 млн евро ажратилиши керак эди. Бироқ, бу маблағ “Река-мед”ни сотиб олишга йўналтирилди.
“Река-мед” Ўзбекистонда 2006 йилда Россия ва Буюк Британия билан қўшма корхона сифатида ташкил қилинган. 31 март ҳолатига кўра, компания таъсисчилари 95,2 фоиз улуш билан Emiko Holding ва 4,8 фоиз улуш билан Маҳбуба Маманова ҳисобланади.
