Rossiyada AQSHni ham yo‘q qilishga qodir zamonaviy qurol borligi ma’lum qilindi

Rossiya o‘zining mavjudligiga tahdid bo‘lgan taqdirda har qanday dushmanni yo‘q qilishi mumkin, chunki u noyob zamonaviy qurollarga ega. Bu haqda Rossiya Xavfsizlik kengashi kotibi Nikolay Patrushev “Rossiyskaya gazeta”ga bergan intervyusida ma’lum qildi.

Patrushev bunday qurol AQSHni ham yo‘q qilishga qodirligini qayd etdi. U Amerika strategik bombardimonchi samolyotlarining Rossiya chegaralari yaqinidagi parvozini xavfli deb baholadi. 

“Bunga nisbatan bir narsani aytishimiz mumkin. Rossiya sabrli va o‘zining harbiy ustunligi bilan hech kimni qo‘rqitmaydi. Ammo u har qanday raqibni, jumladan, AQSHni ham o‘z mavjudligiga tahdid tug‘ilganda yo‘q qilishga qodir zamonaviy noyob qurollarga ega”, — dedi Patrushev.

Shuningdek, Rossiya Xavfsizlik kengashi kotib Moskva unga yordam so‘rab murojaat qilgan har qanday xalqlarning suvereniteti va davlatchiligining tarixiy himoyachisi ekanini aytdi.

“Rossiya AQSHni kamida ikki marta — Inqilobiy urush va Fuqarolar urushi davrida qutqardi. Ammo bu safar AQSHga o‘z yaxlitligini saqlashga yordam berish noo‘rin”, — ta’kidladi u.