Prezidentning tegishli qarori bilan, Toshkent shahridagi isteʼmolchilarning energiya resurslariga o‘sib borayotgan talabini taʼminlash maqsadida bir qator chora-tadbirlar belgilandi, deb xabar beradi O‘zA.
Xususan, Energetika vazirligi, Toshkent shahri hokimligi, “Navoiy KMK” AJ, “Olmaliq KMK” AJ, “O‘zavtosanoat” AJ va “O‘zmetkombinat” AJning takliflariga asosan 2023-yilda Toshkent shahri elektr taʼminotini yaxshilashga qaratilgan 35–110 kV kuchlanishli elektr tarmoqlarini rivojlantirish loyihasi tasdiqlandi.
- Yunusobod, Shayxontohur, Mirzo Ulug‘bek, Yashnobod va Yangihayot tumanlarida umumiy quvvati 664 MVA bo‘lgan 5 ta 110 kV kuchlanishli podstansiya hamda 49,6 kilometr uzunlikdagi 35 kV va 110 kV kuchlanishli elektr uzatish tarmoqlarini quriladi;
- Yunusobod, Mirzo Ulug‘bek, Olmazor va Mirobod tumanlaridagi 4 ta podstansiyani rekonstruksiya qilish orqali ularning o‘tkazish quvvatini 179 MVAga oshiriladi;
- jismonan eskirgan 7,5 kilometr uzunlikdagi 35 kV va 41,7 kilometr uzunlikdagi 110 kV kuchlanishli elektr uzatish tarmoqlarini zamonaviy turdagi kabel va simlarga almashtiriladi.
Qayd etilishicha, 2023-yilda past kuchlanishli transformator punktlari va kabel mahsulotlarini xarid qilish uchun Toshkent shahar hokimligi tomonidan “O‘zmilliybank” AJdan 220 milliard so‘m miqdorida kredit mablag‘lari jalb qilinadi va “Hududiy elektr tarmoqlari” AJ uchun belgilangan tartibda ochiladigan maxsus hisobvaraqqa o‘tkazib beriladi.
Toshkent shahri hokimligi tomonidan jalb qilingan kredit mablag‘lari 2024-yildan boshlab “Hududiy elektr tarmoqlari” AJ tomonidan tegishli tarmoq jadvaliga muvofiq to‘lab beriladi. loyihalashtirish, ekspertiza va qurilish-montaj ishlari“Hududiy elektr tarmoqlari” AJ tomonidan xo‘jalik usulida amalga oshiriladi.
Izoh (0)