Nukusda portlagan to‘rt qavatli uy vayronalari ostidan olib chiqilgan 5 yoshli qizaloq Elvira Tirnakova vafot etdi. Bu Telegram’dagi Qitmir muxbir kanali xabar berdi.
2023-yilning 30-yanvar kuni soat 02:30 larda FVV qutqaruvchilari tomonidan turli darajadagi jarohatlar bilan vayronalar ostidan olib chiqilgan qizaloq malakali tibbiy yordam ko‘rsatish uchun shifoxonaga yuborilgandi.
“Daryo”ga maʼlum bo‘lishicha, vayronalar ostidan olib chiqilgan 5 yoshli qizaloq 8-mart kuni shifoxonada vafot etgan. Respublika Sog‘liqni saqlash vazirligi axborot xizmatining qo‘shimcha qilishicha, qizaloqda biologik o‘lim 8-mart kuni tungi soat 01:20 da ro‘y bergan.
Nukusdagi ko‘p qavatli uy portlashi oqibatida Elvira Tirnakovaning buvisi, onasi (1995-yilda tug‘ilgan) va tug‘ilganiga 100 kun bo‘lgan ukasi vafot etgandi. Hozirda oilaning faqat bitta aʼzosi — Elviraning otasi Qoblan Tirkanov hayot. U hodisa yuz bergan vaqti Toshkentda bo‘lgan.
Izoh (0)