“Sirdaryo viloyatida yashovchi 24 yoshli ayol o‘zida OIV infeksiyasi bo‘la turib erkaklar bilan jinsiy aloqaga kirishgani aniqlandi”, — deb xabar beradi viloyat IIB axborot xizmati.
Qayd etilishicha, M.S. ismli ayol 2020-yil 13-fevralda Sirdaryo viloyati OITSga qarshi kurashish markazi tomonidan OIV infeksiyasining yuqtiruvchisi sifatida ro‘yxatga olingan. U boshqa shaxslarga OIV infeksiyasini yuqtirgan taqdirda jinoiy javobgarlikka tortilishi to‘g‘risida tegishli tartibda ogohlantirilgan.
Shunday bo‘lsa-da, ayol qasddan jinoyat sodir qilish yo‘liga o‘tib, 2022-yil avgust oyidan 2022-yil dekabr oyiga qadar bo‘lgan vaqt oralig‘ida Buxoro tumani hududida joylashgan cho‘l zonasida 4 nafar fuqaro bilan birga bir necha marotaba jinsiy aloqada bo‘lgan. Ayol o‘zida OIV infeksiyasi borligini oldindan bilgan holda ushbu kasallikni boshqa shaxslarga yuqtirishga uringan.
Mazkur holat yuzasidan Jinoyat kodeksining 113-moddasi (Tanosil yoki OIV kasalligi/OITSni tarqatish) 4-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
Ma’lumot uchun, 2022-yilning 1-yanvar holatiga ko‘ra, respublikada ro‘yxatga olingan OIV bilan kasallanganlar soni 45 ming nafarni tashkil etmoqda. OIVni yuqtirib olgan shaxslarning aksariyat qismi maxsus antiretrovirus davolash bilan qamrab olingan. Shunday muolajalarni olayotgan shaxslarning 74 foizida virus yuklamasi bir necha marta kamaygan.
Izoh (0)