Sirdaryo tumanidagi “Qolgansir“ davlat o‘rmon ov xo‘jaligi yer maydonida yong‘in sodir bo‘lgani to‘g‘risida xabar berilgandi. Bosh prokuratura matbuot kotibining ma’lum qilishicha, hodisa oqibatida o‘simlik dunyosiga 167,7 million so‘m miqdorida zarar yetkazilgan.
Qayd etilishicha, 7-mart kuni olovga ehtiyotsiz munosabatda bo‘lish oqibatida Sirdaryo tumanidagi davlat o‘rmon ov xo‘jaligi yer maydonidagi ekinzor, o‘rmon, daraxt va boshqa o‘simliklar yongan. Natijada o‘simlik dunyosiga jami 167,7 million so‘m zarar yetkazilgan.
Mazkur holat yuzasidan Jinoyat kodeksining 198-moddasi (Ekinzor, o‘rmon, daraxtzorlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atilgan. Sirdaryo tumani IIB TB tomonidan tergov harakatlari olib borilmoqda.
Avvalroq Tabiat resurslari vazirligi yong‘inning kelib chiqishiga “Sholikor” va “Sindorobod” SIU hududida faoliyat olib boruvchi 35 nafar fermer va dehqon xo‘jaliklari tomonidan sholidan bo‘shagan yer maydonidagi o‘simlik qoldiqlari yoqib yuborilgani sabab bo‘lganini ma’lum qilgandi. Vazirlikning xabariga ko‘ra, hududdagi 311,7 gektar dala yer maydoni yongan. Yong‘in oqibatida yerning unumdor qatlamidagi ball boniteti pasayishiga sabab bo‘lgan holatlar bo‘yicha dastlabki hisob-kitoblar qilinib, 295 million 627 ming so‘m miqdorida zarar qayd etilgan.
Viloyat Favqulodda vaziyatlar boshqarmasi bayonotiga ko‘ra, hududda taxminan 5 gektar maydonda quruq o‘t va qamishlar yongan.
Izoh (0)