Самарқанд шаҳрда 64 нафар фуқарони АҚШга юборишини айтиб, уларнинг 4 миллиард сўмини ўзлаштирганларга суд ҳукми ўқилди. Бу ҳақда Ички ишлар вазирлиги ахборот хизмати хабар берди.
Хабарга кўра, муқаддам фирибгарлик жинояти билан судланган, Самарқанд шаҳрида яшовчи 35 ёшли жиноий гуруҳ раҳбари МЧЖ ташкил этган. Ўзи томонидан ташкил этилган жамиятга 24-25 ёшли қизларни ишчи сифатида ёллаган. Режага кўра уйишган гуруҳ аъзоларини МЧЖнинг Самарқанд ҳамда ЖИззах шаҳридаги филиалларига масъул шахс этиб тайинган.
Улар ўзини Green Card’дан ютуқ чиққан қиз сифатида таништириб, пулларни қўлга киритган. Шунингдек, ютуқ чиқмаган фуқароларга ютуқ чиққанини айтиб, қарз шартномаси ва шунга ўхшаш сохта шартномаларни тузган. Фуқароларга авиачипта олиб бериш, АҚШ элчихонасидан виза олиш учун қўлга киритилган пулларни МЧЖнинг ҳисоб рақамига кирим қилгани тўғрисида сохта таклифномалар кўрсатган.
Жиноий гуруҳ жиззахлик 19 нафар, самарқандлик 45 нафар жабрланувчиларнинг жами 4 миллиард сўмини қўлга киритган ва ўз манфаатлари йўлида ишлатиб юборган. Ҳолат жиноят ишлари бўйича Самарқанд шаҳар судида кўриб чиқилди. Гуруҳ аъзоларининг айримларига нисбатан 9 йил озодликдан маҳрум қилиш жазоси тайинланди. Шунингдек, жиноий гуруҳнинг 3 нафар қизи 5 йилга озодликдан маҳрум этилди.
Бундан ташқари, суд жиноят ишини тергов қилиш жараёнида қўпол камчиликларга йўл қўйгани сабабли Самарқанд ва Жиззах шаҳри бўйича ИИО ФМБ тергов бўлими терговчиларига ҳамда гуруҳ аъзоларидан бирига мамлакатдан чиқиб кетишига имкон бериш жавобгарлигини таъминламагани учун Самарқанд шаҳар ИИО ФМБга хусусий ажрим чиқарди.
Изоҳ (0)