“Markaziy Osiyoni biror siyosiy chora orqali Rossiya taʼsiridan chiqara olamiz, deb o‘ylayotganlar chuchvarani xom sanaydi” – jurnalist Navbahor Imomova

Biror siyosiy chora orqali Markaziy Osiyoni Rossiya taʼsiridan chiqarib olish imkonsiz, deya fikr bildirdi “Amerika ovozi” muxbiri Navbahor Imomova “Daryo”ga bergan intervyusida.

Navbahor Imomovaning aytishicha, Vashington mintaqa rasmiylari “Amerika ovozi” muxbiriga biror bir tarafni tanlashga majbur emasliklarini aytib keladi.

“Amerika rasmiylaridan eng ko‘p eshitadigan gapimiz: “biz geografiyani o‘zgartira olmaymiz. Markaziy Osiyoni Xitoyning shundoqqina biqinida yoki Rossiyaning janubida ekani, Eronning sharqiy qismida ekani yoki Afg‘onistonning shimolida ekanini o‘zgartira olmaymiz. Mamlakatlardagi dinamika, u yerdagi siyosatga rahbarlar taʼsir qiladi. Bularni Qo‘shma shtatlar ham, Yevropa ittifoqi ham bartaraf eta olmaydi”, – deyishadi. Yaʼni agar Qo‘shma shtatlarda yoki Yevropa ittifoqida biror bir rasmiy Markaziy Osiyoni Rossiya taʼsiridan chiqara olamiz, deb o‘ylayotgan bo‘lsa, o‘zbekcha qilib aytganda chuchvarani xom sanagan bo‘ladi. Chunki biror siyosiy chora orqali bunday qilish imkonsiz. Mintaqani Rossiya yoki boshqa davlatlar bilan uzoq asrlik madaniy, iqtisodiy-siyosiy rishtalar bog‘lab turadi. Vashington mintaqa, xususan, O‘zbekiston rasmiylariga “biz biror bir tarafni tanlashga majbur emassiz, deymiz”, deya taʼkidlab keladi. Amerika yoki Yevropa ittifoqi bizni tanlang, Rossiya bilan kamroq ishlang, Xitoydan kamroq sarmoya oling, boshqalarni yordamiga tayanmang, demayapti. Va bunday deyayotgan bo‘lsa ham, oddiy qilib aytganda, ahmoqlik bo‘ladi. Bunday deb o‘ylashimizga asos yo‘q”, – dedi jurnalist.

Navbahor Imomovaning qo‘shimcha qilishicha, AQSH Markaziy Osiyo mamlakatlari Rossiya-Ukraina urushida betaraflik pozitsiyasini tanlashga majburligini to‘g‘ri tushunadi.  

“Amerika rasmiylari “ko‘rib turibsiz, biz bu urushda Ukrainani quvvatlayapmiz. Atrofdagi davlatlarning suvereniteti, mustaqilligi va hududiy yaxlitligi buzilishidan ham xavotirdamiz. Biling, agar siz ham bu borada cho‘chiyotgan bo‘lsangiz, sizning tarafingizdamiz. Biz tushunamiz, siz betaraflik pozitsiyasini tanlagansiz. Chunki bu sizga qimmatga tushishi mumkin. Bu borada sizni salbiy baholamaymiz. Lekin biz bilan ham yangi imkoniyatlar ochishingiz mumkin. Hamkorlikni biz kengaytiraverishimiz mumkin”, deyapti. Tarixning mana shu pallasida Amerika Markaziy Osiyo davlatlariga aytyaptiki, “siz tanlashga majbur emassiz. Biz tushunamiz. Rossiya bilan ham rishtalaringiz davom etishi kerak. U yerda mahkam zanjirlar bor. Tushunamiz, biz bilan ham o‘zaro manfaatlaringiz bor. Xavotir olmang, mushtarak manfaatlarimiz yuzasidan ishlayveramiz” deb. Chunki katta-katta mojarolar yuz berganida davlatlar xohlaydimi, yo‘qmi, kim bilan ko‘proq bo‘lishimiz to‘g‘ri, deb o‘ylab qoladi”, – dedi “Amerika ovozi” muxbiri.

Avvalroq AQSH tashqi ishlar vaziri Entoni Blinken O‘zbekiston va Qozog‘istonga tashrif buyurgani, ikki davlat rahbarlari bilan muzokaralar olib borgani xabar qilingandi. Keyin Rossiya tashqi ishlar vaziri Sergey Lavrov Blinkenning tashrifi bo‘yicha munosabat bildirib, AQSHning Markaziy Osiyodagi faolligini oshirishdan maqsadi ularning Rossiya bilan yaxshi munosabatda bo‘lishiga yo‘l qo‘ymaslik ekanini aytdi. 

Mavzuga doir:
AQSH bosh diplomati Toshkentga kelmoqda. Tashrif sabablari haqida jurnalist Navbahor Imomova bilan suhbat (video)

“Muzokaralar yopiq eshiklar ortida bo‘ldi” — AQSH davlat kotibi Entoni Blinkenning Toshkentga tashrifi tahlili (video)