Shveysariyalik qandolatchi nafaqat manekenda ko‘rsatish, balki kiyish ham mumkin bo‘lgan dunyodagi eng katta ko‘ylak shaklidagi tortni yasab, jahon rekordini o‘rnatdi. Natasha Kolin Kim Fah Li Fokas o‘z ijodini Berndagi ko‘rgazmada namoyish etdi. Uning videosi ijtimoiy tarmoqlarda 1,3 million martadan ortiq tomosha qilindi. Qizig‘i shundaki, qandolatchi ko‘ylak shaklidagi tortni ustiga kiygan.
Natasha mohirlik bilan ko‘rgazma ishtirokchilari oldida 130 kg og‘irlikdagi ko‘ylakni kiydi. Ginnes rekordlari kitobi xodimi videoni ijtimoiy tarmoqdagi sahifasida joylashtirdi. U sahifasida: “Kiyish mumkin bo‘lgan 131,15 kilogramm og‘irlikdagi eng katta tort shaklidagi ko‘ylak. Tort SweetyCake’s kompaniyasi xodimi Natasha Kolin Kim Fah Li Fokas tomonidan yaratilgan”, — deb izoh qoldirdi.
Qandolatchi Natasha avvalgi og‘irligi 68 kilogramga teng bo‘lgan ko‘ylak shaklidagi tortning rekordini yangiladi. Metall tayanch, ko‘ylak ushlagich va tortning umumiy og‘irligi 242,75 kilogrammni tashkil qildi. Podiumdagi shoudan tashqari, model libos shaklidagi tortda kamida 5 metr yurishi kerak edi, u bu ishning uddasidan chiqdi.
Swiss World Wedding ko‘rgazmasidagi moda namoyishi finalida qandolatchilikka bo‘lgan qiziqish ommaga namoyish etildi. Taqdimotdan so‘ng ko‘ylak shaklidagi tort bo‘laklarga bo‘linib, mehmonlarga tarqatilgan.
Izoh (0)