Қонунчилик палатаси кенгашининг ва Сенат кенгашининг ҳудудларда аҳоли бандлигини таъминлаш борасида амалга оширилаётган ишлар юзасидан парламент назоратининг самарадорлигини ошириш юзасидан қўшма қарори қабул қилинди.
Мамлакатда ишсиз фуқароларнинг, айниқса, хотин-қизлар ва меҳнат бозорига илк бор кириб келаётган битирувчиларнинг бандлигини таъминлаш ва уларни тадбиркорликка кенг жалб этиш, шунингдек, норасмий бандликни камайтириш бўйича янги таъсирчан механизмлар жорий этилиши натижасида 2022 йил давомида доимий, вақтинчалик ва мавсумий ишларда жами 6 миллиондан зиёд аҳолининг бандлиги таъминланган.
Жумладан, инвестиция лойиҳаларини амалга ошириш ҳисобига 305 минг, қурилишда 139 минг, қишлоқ хўжалигида 3,3 млн, молия-иқтисод, тадбиркорлик ва камбағалликни қисқартириш йўналишида 2,6 миллион ҳамда туризм ва маданият йўналишида 344 минг киши банд бўлган. Айниқса, пахта ва ғалладан қисқартирилган 100 минг гектар ерни очиқ электрон танлов орқали фуқароларга ажратиб бериш ҳисобига 1,3 миллиондан ортиқ киши иш билан таъминланган. Шу даврда 200 мингга яқин тадбиркорлик субекти ташкил қилинган, 10 мингта корхона фаолияти кенгайтирилган, 11 мингта корхона қуввати тикланган.
Оилавий тадбиркорликни ривожлантириш дастурлари доирасида ҳоким ёрдамчиларининг тавсиялари асосида қарийб 10 триллион сўм кредит маблағлари ажратилиши натижасида ўтган йилнинг ўзида камбағаллик даражаси 17 фоиздан 14 фоизга туширилгани, бунда ҳоким ёрдамчилари 1 миллион нафар аҳолини касб-ҳунарга ўқитиб, тадбиркорликни бошлашга кўмаклашгани, даромадли иш билан банд қилгани муҳим омил бўлган.
Бу борадаги ишлар ўтган йил давомида Ўзбекистон Республикаси Олий Мажлиси Қонунчилик палатаси ва Сенати томонидан парламент назорати доирасида палаталар мажлисларида муҳокама қилиниб, Бош вазир ўринбосарларининг ҳамда тегишли вазирлик ва идоралар, ҳудудлар мутасаддиларининг ахборотлари эшитилган, шунингдек, 20 га яқин тизимли муаммо ва камчиликларни бартараф этиш бўйича ҳукуматга таклифлар берилган.
Жорий йилда 5 миллион киши бандлигини таъминлаш, шу жумладан 2 миллион доимий иш ўрни яратиш, 1 миллион кишини камбағалликдан чиқариш юзасидан тармоқ ва ҳудуд раҳбарлари томонидан зарур чора-тадбирлар кўрилади. Мазкур вазифаларни ўз вақтида ва самарали тарзда бажарилиши юзасидан парламент назорати самарадорлигини янада ошириш мақсадида қўшма қарор билан бир қатор чора-тадбирлар белгиланди.
Хусусан, ҳудудларда аҳоли бандлигини таъминлаш борасида амалга оширилаётган ишлар самарадорлигини ўрганиш бўйича йўл харитаси тасдиқланди ҳамда Олий Мажлис Қонунчилик палатаси депутатлари ва Сенати аъзоларидан иборат таркибда ишчи гуруҳ тузилди. Ишчи гуруҳ зиммасига режа-жадвал асосида ҳар ойда ҳудудларга чиқиб, аҳоли бандлигини таъминлаш ҳудудий дастурларининг тасдиқланиши ҳамда амалга оширилиши устидан таъсирчан парламент назоратини олиб бориш, аниқланган муаммоларни тегишли вазирликлар ва идоралар билан ҳамкорликда жойида ҳал этиш, тизимли камчиликларни бартараф қилиш бўйича таклифлар тайёрлаш вазифалари белгиланди.
Парламент аъзолари томонидан Ўзбекистонда аҳоли бандлигини таъминлаш борасида амалга оширилаётган ислоҳотлар, қабул қилинаётган норматив-ҳуқуқий ҳужжатларининг мазмун-моҳияти ва аҳамияти ҳақида кенг тушунтириш-тарғибот ишлари олиб борилади. Парламент назорати тадбирларининг натижалари Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари сессияларида муҳокама қилинади. Шунингдек, йўл харитасида бандлик дастурларининг ижроси, соҳадаги мавжуд тизимли муаммолар атрофлича кўриб чиқилиб, уларни ҳал этиш бўйича мутасадди вазирлик ва идоралар ҳамда ҳудуд раҳбарларининг ахборотлари Олий Мажлис палаталари ҳамда уларнинг тегишли қўмиталарининг қўшма мажлисларида эшитиб борилади.
Изоҳ (0)