“Bu yerda meni hech kim urgani yoki qiynagani yo‘q” – bloger Abduqodir Mo‘minov tergov jarayoni haqida izoh berdi

YouTube platformasidagi “Ko‘zgu” sahifasi muallifi, bloger Abduqodir Mo‘minov tovlamachilik va firibgarlikda ayblanib, qamoqqa olingan edi. Axborot va ommaviy kommunikatsiyalar agentligi va Ichki ishlar vazirligi 24-fevral kuni Toshkent shahar Ichki ishlar bosh boshqarmasi vaqtincha saqlash hibsxonasida Abduqodir Mo‘minov va jurnalistlar uchrashuvini tashkil etdi. “Daryo” muxbiri bloger bilan tergov jarayonlari qanchalik qonuniy kechayotgani to‘g‘risida qisqacha suhbatlashdi.

Mo‘minov nimada ayblanmoqda?

Abduqodir Mo‘minov fevral oyi boshida Toshkent shahar IIBB tomonidan fuqarolar E.Z. va A.T. murojaatlari asosida ushlangan. Unga nisbatan Jinoyat kodeksining 168-moddasi (firibgarlik), 165-moddasi (tovlamachilik) alomatlari bilan jinoyat ishi qo‘zg‘atilgan. Hozirda tergov harakatlari davom etmoqda.

“Hammasi joyida”

Abduqodir Mo‘minov jurnalistlar bilan suhbatda sog‘lig‘i va tergov jarayoni qanchalik qonuniy kechayotgani haqida aytib o‘tdi.

“Sog‘lig‘im yaxshi, hamma joyim tuppa-tuzuk. Bu yerda yaxshi muomala qilishyapti. Hozirgi yotgan xonamiz ozoda, uch mahal ovqat beriladi. O‘zbekiston hukumatini jiddiy tanqid qilib kelardim. Shu sabab menga nisbatan bunday yaxshi muomala qilishadi, deb o‘ylamaganman. Ochig‘i, umuman boshqacha muomala kutgandim. Hozir hammasi joyida.

Ko‘rib turibsizlarku, o‘zgarganim yo‘q, holatim avvalgiday. Nima xato qilgan bo‘lsam, o‘sha bo‘yicha tergov ketyapti. Barchasi qonuniy. Meni kimdir urib yoki boshqa jismoniy, ruhiy qiynoqlar qo‘llagani yo‘q. Tergov harakatlari qonun doirasida bo‘lyapti”, – dedi u.

Suhbat davomida bloger o‘z oilasi yollagan advokatdan nega voz kechgani yuzasidan ham tushuntirish berdi.

“Birinchi marta Bobur Muqaddamov degan advokat keldi. U bilan o‘rtamizda ziddiyat bor edi. To‘g‘risi, shundan keyin boshqa advokatlarga ishonch qolmadi. Shuning uchun undan voz kechdim va o‘zimga ko‘proq ishonganim yaxshi deb o‘yladim. Hozir davlat tomonidan berilgan advokat xizmatidan foydalanyapman. U yaxshi inson ekan. Ayrim huquqiy jihatlarda maslahat so‘rasam, tushuntiryapti. Asosan, o‘zimning huquqimni o‘zim himoya qilyapman. Qaytanga, davlat tomonidan berilgan advokat bosiq, joyida, imkon qadar menga yordam berishga harakat qilyapti”, – dedi bloger.

Ijtimoiy tarmoqlarda bloger A.Mo‘minov vafot etgan haqida xabarlar tarqalgan edi. Muloqot davomida Mo‘minov ushbu holatga ham munosabat bildirdi.

“Ijtimoiy tarmoqlarda ko‘rmasdan, bilmasdan turib yolg‘on gaplar tarqatish kerak emas. O‘zim ham ko‘rmasdan, bilmasdan turib yoritishni yomon ko‘raman. Kimlardir turli yolg‘on maʼlumotlar gapiryapti, chiqaryapti, o‘ziga insof bersin. Ochig‘ini aytaman, mana yashirayotganim yo‘q. Hammasi joyida. Ijtimoiy tarmoqda ham ko‘rgan bo‘lsalaringiz, to‘g‘ri gapirib o‘rgangan odamman. Masalan, kecha onam bilan ko‘rishdim (Zoom orqali – tahr.). Barchasi uchun rahmat”, – dedi bloger.

“Daryo” muxbiri Abduqodir Mo‘minov bilan muloqot jarayonida unda qiynoq va ruhiy bosimlar alomatlarini ko‘rmadi. Uchrashuv video shaklida yozib olindi. Biroq bloger o‘zi aks etgan video, foto yoki audioni OAVda eʼlon qilmaslikni so‘radi.

Maʼlumot uchun, Jinoyat kodeksining 165-moddasi Tovlamachilik, yaʼni jabrlanuvchi yoki uning yaqin kishilariga zo‘rlik ishlatish, mulkka shikast yetkazish yoki uni nobud qilish yoxud jabrlanuvchi uchun sir saqlanishi lozim bo‘lgan maʼlumotlarni oshkor qilish bilan qo‘rqitib o‘zgadan mulkni yoki mulkiy huquqni topshirishni, mulkiy manfaatlar berishni yoxud mulkiy yo‘sindagi harakatlar sodir etishni talab qilish yoxud jabrlanuvchini o‘z mulki yoki mulkka bo‘lgan huquqini berishga majbur qiladigan sharoitga solib qo‘yish – uch yildan besh yilgacha ozodlikni cheklash yohud uch yildan besh yilgacha ozodlikdan mahrum qilish bilan jazolanadi.

Jinoyat kodeksining 68-moddasi Firibgarlik, yaʼni aldash yoki ishonchni suiisteʼmol qilish yo‘li bilan o‘zganing mulkini yoki o‘zganing mulkiga bo‘lgan huquqni qo‘lga kiritish — bazaviy hisoblash miqdorining ellik baravaridan yuz baravarigacha miqdorda jarima yoki ikki yilgacha axloq tuzatish ishlari yoki bir yildan uch yilgacha ozodlikni cheklash yoxud uch yilgacha ozodlikdan mahrum qilish bilan jazolanadi.