Toshkent shahri Chilonzor tumanida 2022-yil oktabr oyida xotinini bo‘g‘ib o‘ldirgan erkakka sud hukmi o‘qildi. Bu haqda “UzReport” xabar berdi.
Ma’lum bo‘lishicha, sudlanuvchi va marhuma 2016-yilda qonuniy nikohdan o‘tgan. Ularnig 2 nafar voyaga yetmagan farzandi bor. Oila muntazam janjallashib kelishi oqibatida 2022-yilning oktabrida er-xotin o‘rtasida kelishmovchilik yuzaga kelib, ayol erini “onasi”dan haqorat qilgan.
Shundan so‘ng sudlanuvchi ayolining haqoratlarini o‘zining erkaklik g‘ururiga tekkan deb hisoblab, uni qasddan o‘ldirgan. Ayolning qornida 9 oylik homilasi bo‘lgan va u 3 kundan so‘ng ko‘zi yorishi kerak bo‘lgan.
“Qizim 2022-yilning boshlarida homilador bo‘ldi, kuyovim agarda qiz farzand bo‘lsa, kerak emas. Agar qiz bo‘lsa, chaqaloqni tug‘uruqxonaga tashlab kelasan, bo‘lmasa o‘zingni ham, farzandlaringni ham o‘ldiraman”, deb qo‘rqitib kelgan“, — deydi marhumaning otasi.
Sudlanuvchi chiqindi yig‘ish maydonchasidagi 1 xonali xonadonda ayoli yolg‘izligi, homiladorligi sababli o‘zini himoya qila olmasligidan foydalanib, bo‘g‘ib o‘ldirgan. Ammo u sud jarayonida aybini tan olmay, bu voqeaga ayolning tog‘asi sababchi ekanini va turmush o‘rtog‘ning homilador ekanidan xabari yo‘qligini aytgan.
Erkak Jinoyat kodeksining 97-moddasi 2-qismi ”b” bandida nazarda tutilgan jinoyatni sodir etganlikda aybli deb topilib, unga 18 yil muddatga ozodlikdan mahrum qilish jazosi tayinlangan.
Izoh (0)