Toshkentda begona erkak yosh bolani o‘g‘irlayotgani aytilgan xabarga izoh berildi

Toshkent shahar Yashnobod tumanida “Begona erkak maktab o‘quvchisini olib qochishga uringani” aytilayotgan videolar tarqaldi. Shahar Ichki ishlar bosh boshqarmasi mazkur videoga izoh berdi. 

Xabarga ko‘ra, videoda aks etgan holat 19-fevral kuni taxminan soat 12:35 larda Yashnobod tumani Aviasozlar-2 dahasidagi 151-sonli umumiy o‘rta ta’lim maktabida sodir bo‘lgan. Noma’lum shaxs shu maktab o‘quvchisi 2011-yilda tug‘ilgan M.O.ni to‘xtatib, qo‘lidan ushlab: “Shu maktabda tahsil olasanmi?” — deb so‘ragan. 

Voyaga yetmagan M.O. ushbu shaxsni tanimagani sababli u bilan gaplashmasligini bildirib, qo‘yib yuborishini aytgan, so‘ng uyiga ketgan.

Bola hozirda ota-onasining yonida sog‘-salomat holatda.

Qayd etilishicha, mazkur holat yuzasidan Yashnobod tumani IIO FMB tomonidan tergovga qadar tekshiruv o‘tkazilmoqda. O‘rganishlar jarayonida videoda aks etgan shaxs 1994-yilda tug‘ilgan M.U. ekani aniqlangan.

“Tekshiruv yakuni bo‘yicha qonuniy qaror qabul qilinishi ta’minlanadi”, — deyiladi xabarda.