Qamchiq dovoni 15-fevral soat 22:40 da qor ko‘chkisi xavfi tufayli avtotransport vositalari harakati uchun vaqtincha yopilgandi. Favqulodda vaziyatlar vazirligi axborot xizmati xabariga ko‘ra, 16-fevral kuni soat 21:00 da dovonda mashinalar harakati tiklangan.
Qayd etilishicha, dovon yopilganidan so‘ng, kuchli qor yog‘ishi sababli ushbu yo‘nalishning bir nechta qismlarida o‘z-o‘zidan qor ko‘chishi kuzatilgan. Respublika idoralararo shtabining tezkorlik bilan qabul qilingan dovonni yopish to‘g‘risidagi qarori tufayli qor ko‘chkisi natijasida hech kim zarar ko‘rmagan.
Shu vaqt mobaynida Favqulodda vaziyatlar vazirligi rahbarligida ixtisoslashtirilgan tuzilmalar tomonidan qor ko‘chkilarining qayta ko‘chish xavfini bartaraf etish bo‘yicha ishlar olib borildi. Dovon yopilgandan so‘ng oraliq hududda bo‘lgan haydovchilar va yo‘lovchilarga transport vositalarini xavfsiz joyga olib borishda yordam berilgan.
Shu vaqt ichida dovonning bir nechta joylarida barcha hohlovchilar uchun isitish punktlari ishlab turgan. Shu bilan birga, Respublika idoralararo shtabining qarori bilan dovonning har ikki tomonida transportni kutayotgan odamlar uchun bir nechta qo‘shimcha ikki tomonlama temiryo‘l reyslari tashkil etilgan. Qor ko‘chkilarini majburan tushurish bo‘yicha ishlar amalga oshirilgan.
Izoh (0)