“Gaziantep” Turkiya Superligasida qatnashmasligini e’lon qildi. Bu zilziladan keyin ligadagi ishtirokini to‘xtatgan ikkinchi klub

“Gaziantep” klubi futbol bo‘yicha Turkiya Superligasidagi ishtirokini to‘xtatishini ma’lum qildi.

“Biz va yana 10 ta qo‘shni shaharga zarar yetkazgan zilziladan qolgan og‘riqlarga qarshi kurashishda davom etamiz. Bunday halokatdan keyin futbol haqida hatto gapirishga ham kuch yo‘q. Avvalo zilzila oqibatida halok bo‘lgan fuqarolarimizni Alloh rahmat qilishini, yaradorlarga esa shifo tilab qolamiz.

Bu qiyin vaziyatda sport faoliyati bilan shug‘ullanishni tasavvur qilolmayapmiz. Direktorlar kengashi tomonidan qabul qilingan qarorga ko‘ra, “Gaziantep” 2022/23-yilgi mavsumda Turkiya Superligasi va Kubogida ishtirok etishdan bosh tortadi”, — deyiladi klub bayonotida.

Avvalroq “Hatayspor” ham Turkiya Superligasidagi ishtirokini yakunlaganini ma’lum qilgandi.

“Gaziantep” 25 ochko to‘plagan holda chempionatda 10-o‘rinda borayotgandi. “Hatayspor” esa 23 ochko bilan 14-pog‘onadan joy olgandi.

Shu tariqa joriy mavsum Turkiya chempionatidagi ishtirokini davom ettiradigan klublar soni 17 ta qoldi.

Ayni vaqtda Turkiyadagi barcha sport musobaqalar qatorida Superliga o‘yinlari ham to‘xtatilgan.

Avvalroq “Malatyaspor” futbol klubi darvozaboni Ayyub Turkaslan zilzila oqibatida vafot etgani ma’lum bo‘lgandi. Zilzila markazlaridan biri bo‘lgan Hatay viloyatining “Hatayspor” klubining 4 nafar futbolchisi va murabbiylar shtabining ikki vakili xarobalar ostidan qutqarib olingani xabar qilingandi.

Shuningdek, Qahramonmarashdagi xalqaro musobaqada qatnashish uchun borgan o‘zbekistonlik yosh kurashchilar zilzila epitsentridan olib ketilgan va Anqara—Istanbul—Toshkent reysi bilan O‘zbekistonga qaytib kelishi ma’lum bo‘lgandi.

6-fevral kuni Turkiyaning janubi-sharqiy qismida 7,7 magnitudali zilzila sodir bo‘ldi. yer qimirlashlari oqibatida Turkiya va Suriya qator viloyatlaridagi uylar vayronaga aylandi. Turkiya prezidenti Rajab Toyyib Erdo‘g‘on mamlakatda 7 kunlik milliy motam e’lon qildi, tabiiy ofatdan jabr ko‘rgan o‘nta viloyatda 90 kunlik favqulodda holat joriy etildi.

So‘nggi xabarlarga ko‘ra, Turkiyada tabiiy ofatdan halok bo‘lganlar soni 24 mingdan, jarohatlanganlar soni 80 ming nafardan oshdi.