Butun dunyo ayollari mashhur sumkalarni biladi, lekin ular bilan bogʻliq chiroyli hikoyalardan hamma ham xabardor emas. Biz taniqli shaxslar nomi bilan atalgan beshta mashhur sumkani toʻpladik, deb yozadi “Noviy ochag” nashri.
Kelly, Hermes
Sumka 1935-yilda yaratilgan, ammo u Kelly nomi bilan u 21 yil oʻtgachgina Greys Kelly Monako shahzodasi Reynier III ga turmushga chiqqanida mashhur boʻldi. Ijtimoiy tadbirlardan birida Greys homiladorligini bildirmaslik uchun Hermes sumkasini qoʻliga baland koʻtarib oldi. Shu holat tushib qolgan surat millionlab nusxada dunyo boʻylab tarqaldi. Ushbu voqeadan soʻng modalar uyi rahbari Jan-Lui Dyuma sumkaga Kelly nomini berishga qaror qildi. Bu oʻz vaqtida uddaburonlik bilan qilingan marketing harakati boʻldi. Hanuz ushbu sumkani navbatlarda turib xarid qilishlariga sabab uning oʻziga xos tarixidir.
Jackie, Gucci
Amerika Qoʻshma Shtatlarining sobiq birinchi xonimi Jaklin Kennedi Gucciʼni yoqtirardi. Uning kolleksiyasida brendning barcha aksessuarlari, kiyimlari va H shaklidagi qisqichli sumka mavjud edi. Jaklin bu sumkani shu qadar mashhur qildiki, brend afsonaviy hobo sumkasiga Jackie nomini berishga qaror qildi. Aytgancha, 2020-yilda Alessandro Mishel ushbu modelni qaytadan ishlab chiqardi, bugungi kunda bu moda olamidagi xonimlarning orzu qiladigan xaridlaridan biridir.
Lady Dior, Dior
Diorʼning afsonaviy kvadrat sumkasi 1994-yilda yaratilgan va “Chouchou” deb nomlangan, bu fransuzcha “sevimli” degan maʼnoni anglatadi. Sumka chiqarilgandan soʻng darhol Fransiyaning birinchi xonimi Bernadet Shirak uni malika Diananing Parijga tashrifi sharafiga sovgʻa sifatida sotib oladi. Xonim Di sumkalarni shunchalik yaxshi koʻrar ediki, u har xil rangdagi har xil variantlarni buyurtma qilardi. Brend yulduz mijozning sodiqligini yuqori baholab, “Chouchou” nomini Lady Dior deb oʻzgartirdi — bu nom Lady Di ismiga mos keladi.
Monica, Dolce & Gabbana
Monika Belluchchi va ijodiy duet Stefano Gabbana hamda Domeniko Dolche oʻzaro doʻstlik, cheksiz muhabbat tuygʻulari bilan bogʻlangan. Domenikoning oʻzi Monika koʻpincha brend kolleksiyalarining ilhomlantiruvchisi ekaniga iqror boʻlgan. Brend 2014-yilda Monikaga bagʻishlangan birinchi sumkani taqdim qildi: bu klassik Monica sumkasi edi. Beluchchi koʻpdan beri orzu qilgan sumka edi. Timsoh terisidan ishlangan qora rangli loklangan sumkani modelning qoʻlida tez-tez koʻrish mumkin.
Sofia, Salvatore Ferragamo
20-asrning eng goʻzal ayollaridan biri, kino afsonasi va millionlar kumiri Sofiya Loren har doim Salvatore Ferragamo brendiga sodiq boʻlib kelgan. Sofiyaning kolleksiyasida italyan brendining oʻnlab sumka va poyabzallari bor edi. Hurmat va eʼtirof belgisi sifatida Salvatore Ferragamoning oʻzi yulduz mijoziga bagʻishlab Sofia sumkasini yaratdi. Ushbu sumka hali ham zamonaviy modellarning eng kerakli aksessuarlaridan biri boʻlib, ayniqsa, Sofiyaning sevimli qizil ranglisi alohida qadrlanadi.
Mavzuga doir:
Izoh (0)