Shavkat Mirziyoyev huzurida 2023-yilda inflyatsiya darajasini pasaytirish choralari muhokamasi yuzasidan yig‘ilish o‘tkazildi. Bu haqda Prezident matbuot xizmati xabar berdi.
Ma’lum qilinishicha, 2022-yil yakuni bilan O‘zbekistonda inflyatsiya 12,3 foizni tashkil etgan. Barcha iqtisodiy mexanizmlarni qo‘llab, 2023-yilda bu ko‘rsatkichni 10 foizdan pastga tushirish maqsad qilinmoqda.
Buning uchun iste’mol tovarlari, shu jumladan, oziq-ovqat mahsulotlari ishlab chiqarish hajmini oshirish, ularni daladan dasturxongacha yetkazib berishdagi xarajatlarni qisqartirib, arzon bo‘lishini ta’minlash zarurligi ta’kidlandi. Qishloq xo‘jaligi mahsulotlari yetishtirishni ko‘paytirish uchun aholiga ajratilgan jami 200 ming gektar yerdan unumli foydalanish bo‘yicha ko‘rsatmalar berildi.
Ushbu chora-tadbirlarni tizimli tashkil etish uchun hududlar salohiyatidan kelib chiqib, har bir tuman va shahar bo‘yicha alohida yo‘l xaritalari ishlab chiqish vazifasi qo‘yildi. Aholi daromadlarini oshirishda ularning bo‘sh pul mablag‘larini moliya bozoriga jalb qilish muhim ahamiyatga ega. Bu borada yaratilayotgan qulayliklar o‘z natijasini bermoqda. Jumladan, oxirgi uch yilda aholining bankdagi omonatlari 2 baravarga oshdi. Yig‘ilishda aholi uchun jozibador moliyaviy xizmatlar turlarini ko‘paytirish bo‘yicha ko‘rsatmalar berildi.
Izoh (0)