Ijtimoiy tarmoqlarda O‘zbekistonning birinchi prezidenti Islom Karimovning (2016-yil 2-sentabr kuni vafot etgan) 2022-yil oktabrida “yozgan” matni chop etilgan kitobdagi sahifa surati tarqaldi. “Daryo” muxbiri holat yuzasidan izoh olish uchun Adliya vazirligi matbuot xizmati bilan bog‘landi.
Axborot xizmati rahbari Sevara O‘rinboyevaning ma’lum qilishicha, bu kitob “Adolat” milliy huquqiy axborot markazi nashriyotida chiqarilgan yangi tahrirdagi Mehnat kodeksining “signal” versiyasi hisoblanadi.
“Rasmdagi holat kitobning oxirgi emas, signal versiyasida bor. Signal versiyada shunaqa texnik xatolik ketgan. Keyin tekshiruvdan so‘ng to‘g‘rilangan. Tarmoqda esa eski versiyadagi xatolik tarqab ketgan”, — deydi vazir matbuot kotibi.
Sevara O‘rinboyevaning qo‘shimcha qilishicha, signal versiya ko‘p nusxada chiqmaydi.
“Bundan maqsad — o‘sha soha vakillari ko‘rib bersin, degan mazmun. So‘nggi, xatolari to‘g‘rilangan versiya 2 mingdan oshiq adadda bosmadan chiqarilgan. Yakuniy kitobda bunday xatolik yo‘q”, — deya holatni izohlagan matbuot xizmati rahbari.
“Adolat” huquqiy axborot markazining ma’lum qilishicha, 2022-yil dekabr oyida yangi Mehnat kodeksi 1 000 ta nusxada (o‘zbek va rus tillarida) chop etilgan.
Kodekslarning rus tilida yozilgan nashridagi texnik xatolik ularning 238 tasi sotib bo‘lingach aniqlanib, do‘konlardan qolgan kodekslar zudlik bilan yig‘ib olingan.
Mazkur texnik xatolikka yo‘l qo‘ygan sohaga mas’ul shaxslarga nisbatan intizomiy jazo chorasi qo‘llangan.
“Ushbu texnik xatoligi mavjud kodeksni sotib olgan fuqarolarimiz (71) 233-25-65, (33) 280-55-40 raqamlariga aloqaga chiqishlarini so‘raymiz. Kodekslarning to‘g‘rilangan shakli sizga yetkazib beriladi”, — deyiladi xabarda.
Izoh (0)