Ижтимоий тармоқларда Ўзбекистоннинг биринчи президенти Ислом Каримовнинг (2016 йил 2 сентябрь куни вафот этган) 2022 йил октябрида “ёзган” матни чоп этилган китобдаги саҳифа сурати тарқалди. “Дарё” мухбири ҳолат юзасидан изоҳ олиш учун Адлия вазирлиги матбуот хизмати билан боғланди.
Ахборот хизмати раҳбари Севара Ўринбоеванинг маълум қилишича, бу китоб “Адолат” миллий ҳуқуқий ахборот маркази нашриётида чиқарилган янги таҳрирдаги Меҳнат кодексининг “сигнал” версияси ҳисобланади.
“Расмдаги ҳолат китобнинг охирги эмас, сигнал версиясида бор. Сигнал версияда шунақа техник хатолик кетган. Кейин текширувдан сўнг тўғриланган. Тармоқда эса эски версиядаги хатолик тарқаб кетган”, — дейди вазир матбуот котиби.
Севара Ўринбоеванинг қўшимча қилишича, сигнал версия кўп нусхада чиқмайди.
“Бундан мақсад — ўша соҳа вакиллари кўриб берсин, деган мазмун. Сўнгги, хатолари тўғриланган версия 2 мингдан ошиқ ададда босмадан чиқарилган. Якуний китобда бундай хатолик йўқ”, — дея ҳолатни изоҳлаган матбуот хизмати раҳбари.
“Адолат” ҳуқуқий ахборот марказининг маълум қилишича, 2022 йил декабрь ойида янги Меҳнат кодекси 1 000 та нусхада (ўзбек ва рус тилларида) чоп этилган.
Кодексларнинг рус тилида ёзилган нашридаги техник хатолик уларнинг 238 таси сотиб бўлингач аниқланиб, дўконлардан қолган кодекслар зудлик билан йиғиб олинган.
Мазкур техник хатоликка йўл қўйган соҳага масъул шахсларга нисбатан интизомий жазо чораси қўлланган.
“Ушбу техник хатолиги мавжуд кодексни сотиб олган фуқароларимиз (71) 233-25-65, (33) 280-55-40 рақамларига алоқага чиқишларини сўраймиз. Кодексларнинг тўғриланган шакли сизга етказиб берилади”, — дейилади хабарда.
Изоҳ (0)