Surxondaryoda xususiy korxona xodimi noqonuniy ravishda o‘ziga qo‘shimcha 225,5 mln so‘m oylik yozgani aniqlandi

Surxondaryoda ish haqi, obuna va kommunal toʻlovlariga tegishli mablagʻlarni oʻzlashtirgan shaxslar aniqlandi.

Bosh prokuratura huzuridagi departamentning Termiz shahar boʻlimi tomonidan tadbirkorlik subyektlarining huquqlarini himoya qilish yuzasidan oʻtkazilgan tergovga qadar tekshiruvda “T.n.” MCHJning bank ishlarini yurituvchi F.E. ish haqi va unga tenglashtirilgan mablagʻlardan tashqari, elektron dasturga oʻziga qoʻshimcha ish haqi sifatida maʼlumotlar kiritib, MCHJning jami 225,5 million soʻmini plastik kartasiga oʻtkazib olib, tadbirkorning mulkini oʻzlashtirish yoʻli bilan talon-toroj qilgani aniqlangan.

Shu kabi, departamentning Toʻraqoʻrgʻon tuman boʻlimi tomonidan oʻtkazilgan tergovga qadar tekshiruvda tuman pochta aloqa bogʻlamasi sobiq kassiri SH.SH. oʻziga ishonib topshirilgan obuna va kommunal toʻlovlaridan tushgan 93,1 million soʻm naqd pullarni bank kassasiga kirim qilmasdan, oʻzlashtirish yoʻli bilan talon-toroj qilgani aniqlangan.

Mazkur holatlar yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) bilan jinoyat ishlari qoʻzgʻatilib, tergov harakatlari oʻtkazilmoqda.