Ijtimoiy tarmoqlarda O‘zbekiston Milliy universiteti (O‘zMU)ning talabalar yotoqxonasida yashash uchun sharoit yo‘qligi, yaʼni xonalar sovuqligi va issiq suv muammo bo‘layotgani haqidagi postlar tarqaldi. “Daryo” muxbiri Talabalar shaharchasiga borib, holatni o‘rgandi.
Dastlab O‘zMUning 1-talabalar turar joyidagi vaziyat bilan tanishildi. Yotoqxonada turuvchi talabalar muammo yo‘qligi va hammasi joyida ekanligini aytishdi.
“Xonalarimiz issiq. Aynan mana shu birinchi yotoqxonada kamchiliklar bo‘lmadi, sovuqdanam yaxshi o‘tdik, uncha bilinmadi”, - dedi talabalardan biri.
Yana bir talabaning aytishicha, yotoqxonadagi harorat judayam yaxshi: “Talabaga bundan ortiq sharoit bo‘lmasa kerak, menimcha eng zo‘r sharoit shu. Issiq-sovuq suvlardan muammo yo‘q, har doim o‘z vaqtida bo‘lgan”.
Maʼlum bo‘ldiki, mazkur 1-talabalar turar joyining binosi yangi qurilgan bo‘lib, markaziy issiqlik tizimidan emas, balki alohida qozonxona orqali isitiladi. Shu bois mazkur binoda muammolar kuzatilmagan.
Talabalar sovuq ekanidan shikoyat qilgan 16-sonli talabalar turar joyi binosida esa, haqiqatan ham issiqlik taʼminoti bilan bog‘liq muammolar borligi maʼlum bo‘ldi.
Talabalalardan birining aytishicha, xonalar sovuq bo‘lgani uchun isitish moslamasidan foydalanmoqchi bo‘lgan, lekin yotoqxona masʼullari uni olib qo‘ygan.
O‘zbekiston Milliy universiteti prorektori Valijon Yodgorov maʼlum qilishicha, oliygohda 10 ta talabalar turar joyi bo‘lib, ularda 5 ming 130 nafar talaba yotoq o‘rinlari bilan taʼminlangan.
“Bugungi kunda shu 10 ta talabalar turar joyidan bittasi, yaʼni birinchi yotoqxona lokal qozonxona bilan isitiladi. Bu yotoqxonamizda harorat yaxshi shu kungacha ham, boshqa yotoqxonadan kelgan talaba qizlarimizni shu yotoqxonaga joylab issiq haroratni taʼminlab berdik.
Ammo qolgan yotoqxonalarimizda harorat +14 gradusdan +18 gradusgacha, baʼzi holatlarda undan ham past bo‘lishi mumkin. Sababi bizda issiqlik markazlashgan tizimi orqali yuboriladi. Biz uni o‘zgartirish imkoniyatiga ega emasmiz. Talabalar shuning uchun ham universitet rahbariyati tomonidan ogohlantirildi. Mana hozir to‘rtinchi bosqich talabalaridan boshqa talabalarda imtihon ketyapti. Shu davrda rahbariyat tomonidan bir hafta bemalol o‘rganib, yashash sharoit yaxshi bo‘lsa, keyin kelish imkoniyati berilgan, hech kim majburiy chaqirilmagan. Ammo yotoqxonalarda shunaqa holatki, hozir bizga to‘rt mingdan ortiq talaba yetib kelgan.
Biz talabalarga ortiqcha isitish moslamalaridan foydalanishga ruxsat bera olmaymiz. Bu birinchidan yong‘in xavfsizligiga zid. Ikkinchidan, bu kabi katta kuchlanishni elektr quvvati ko‘tarmaydi”, — dedi Valijon Yodgorov.
“Daryo” voqealar rivojini kuzatib boradi.
Izoh (0)