G‘uzor tumani hokimi Bekzod Suyunov Turkmaniston davlati bilan chegaradosh va tuman markazidan 70 kilometr uzoqlikda joylashgan “Qorako‘l” mahallasining Janqara qishlog‘ida bo‘lib, aholi muammolarini o‘rganish uchun shu qishloqdagi xonadonlarning birida tunab qoldi. Bu haqda “Daryo”ga tuman hokimligi axborot xizmati rahbari Xudoyberdi Yo‘ldoshev maʼlum qildi.
“Aholi muammolarini mahallaning o‘ziga borib o‘rganish biz rahbarlar oldiga qo‘yilgan asosiy vazifa. Lekin olis qishloqda bir necha soat bo‘lish, bu — aholi muammolarini o‘rganish uchun yetarli emasligi hammaga maʼlum. Shu sababli, bir kecha ushbu qishloqda qolib, aholi ayniqsa, yoshlarning dard-u tashvishlarini tinglashni lozim topdim”, — deydi hokim Bekzod Suyunov.
Hokimning sayyor qabulida qishloq ahlining elektr energiyasi taʼminotini yaxshilash, ichki yo‘llarni taʼmirlash, ichimlik suvi va suyultirilgan gaz ballonlarni o‘z vaqtida yetkazib berish hamda tibbiy xizmatni yaxshilash kabi masalalardagi murojaatlari tinglangan.
“Bildirilgan murojaatlarni qonuniy hal etish uchun mutasaddi tashkilotlarga ko‘rsatmalar berilib, ijrosi nazoratga olindi. Olis qishloq aholisining murojaatlariga ijobiy yechim topildi”, — deydi hokimlik axborot xizmati rahbari Xudoyberdi Yo‘ldoshev.
Hokimning qishloqqa tashrifi davomida doshqozonlarda osh damlangan. Tuman hokimining aholi bilan suhbati bir piyola choy ustida davom etgan.
“Tuman hokimi sayyor qabuldan so‘ng, qishloqda joylashgan 25-sonli umumtaʼlim maktabi va qishloq oilaviy poliklinikasini ham ko‘zdan kechirdi. Maktabning isitish tizimi, o‘quvchilarning bo‘sh vaqtlarini mazmunli o‘tkazish maqsadida qilingan sharoitlar hamda maktabning axborot texnologiyalari bilan taʼminlanganlik darajasini o‘rgandi. Qishloq oilaviy poliklinikasining tibbiy xizmat ko‘rsatish holati bilan qiziqdi. Shuningdek, tuman hokimi ijtimoiy soha obyektlaridagi shart-sharoitlari bilan tanishar ekan, kelajak avlod vakillarining sifatli taʼlim olishida, tibbiy xizmat ko‘rsatishni yaxshilash uchun barcha birdek masʼul ekanligini taʼkidladi”, — deydi hokimlik vakili.
Tuman hokimining olis qishloqqa tashrifi davomida, shuningdek ehtiyojmand oilalar va keksalar holidan ham xabar olingan.
Izoh (0)