Ижтимоий тармоқларда Ўзбекистон Миллий университети (ЎзМУ)нинг талабалар ётоқхонасида яшаш учун шароит йўқлиги, яъни хоналар совуқлиги ва иссиқ сув муаммо бўлаётгани ҳақидаги постлар тарқалди. “Дарё” мухбири Талабалар шаҳарчасига бориб, ҳолатни ўрганди.
Дастлаб ЎзМУнинг 1-талабалар турар жойидаги вазият билан танишилди. Ётоқхонада турувчи талабалар муаммо йўқлиги ва ҳаммаси жойида эканлигини айтишди.
“Хоналаримиз иссиқ. Айнан мана шу биринчи ётоқхонада камчиликлар бўлмади, совуқданам яхши ўтдик, унча билинмади”, - деди талабалардан бири.
Яна бир талабанинг айтишича, ётоқхонадаги ҳарорат жудаям яхши: “Талабага бундан ортиқ шароит бўлмаса керак, менимча энг зўр шароит шу. Иссиқ-совуқ сувлардан муаммо йўқ, ҳар доим ўз вақтида бўлган”.
Маълум бўлдики, мазкур 1-талабалар турар жойининг биноси янги қурилган бўлиб, марказий иссиқлик тизимидан эмас, балки алоҳида қозонхона орқали иситилади. Шу боис мазкур бинода муаммолар кузатилмаган.
Талабалар совуқ эканидан шикоят қилган 16-сонли талабалар турар жойи биносида эса, ҳақиқатан ҳам иссиқлик таъминоти билан боғлиқ муаммолар борлиги маълум бўлди.
Талабалалардан бирининг айтишича, хоналар совуқ бўлгани учун иситиш мосламасидан фойдаланмоқчи бўлган, лекин ётоқхона масъуллари уни олиб қўйган.
Ўзбекистон Миллий университети проректори Валижон Ёдгоров маълум қилишича, олийгоҳда 10 та талабалар турар жойи бўлиб, уларда 5 минг 130 нафар талаба ётоқ ўринлари билан таъминланган.
“Бугунги кунда шу 10 та талабалар турар жойидан биттаси, яъни биринчи ётоқхона локал қозонхона билан иситилади. Бу ётоқхонамизда ҳарорат яхши шу кунгача ҳам, бошқа ётоқхонадан келган талаба қизларимизни шу ётоқхонага жойлаб иссиқ ҳароратни таъминлаб бердик.
Аммо қолган ётоқхоналаримизда ҳарорат +14 градусдан +18 градусгача, баъзи ҳолатларда ундан ҳам паст бўлиши мумкин. Сабаби бизда иссиқлик марказлашган тизими орқали юборилади. Биз уни ўзгартириш имкониятига эга эмасмиз. Талабалар шунинг учун ҳам университет раҳбарияти томонидан огоҳлантирилди. Мана ҳозир тўртинчи босқич талабаларидан бошқа талабаларда имтиҳон кетяпти. Шу даврда раҳбарият томонидан бир ҳафта бемалол ўрганиб, яшаш шароит яхши бўлса, кейин келиш имконияти берилган, ҳеч ким мажбурий чақирилмаган. Аммо ётоқхоналарда шунақа ҳолатки, ҳозир бизга тўрт мингдан ортиқ талаба етиб келган.
Биз талабаларга ортиқча иситиш мосламаларидан фойдаланишга рухсат бера олмаймиз. Бу биринчидан ёнғин хавфсизлигига зид. Иккинчидан, бу каби катта кучланишни электр қуввати кўтармайди”, — деди Валижон Ёдгоров.
“Дарё” воқеалар ривожини кузатиб боради.
Изоҳ (0)