Marhum qiziqchi Hojiboy Tojiboyevning kenja qizi Madina Tojiboyeva bo‘lajak turmush o‘rtog‘i bilan qanday tanishgani, otasi nima sababdan vafot etgani va uni “o‘ldirib ketishgan” deb tarqalgan mish-mishlarga javobi, hayotidagi qiyinchiliklari haqida gapirib berdi.
“Bo‘lajak turmush o‘rtog‘im bilan o‘rtamizda 7 yosh farq bor”
Men Islom akamni aka sifatida qabul qilganman, lekin ular meni hech qachon singil yoki do‘st sifatida qabul qilmagan. Bo‘lajak turmush o‘rtog‘im bilan o‘rtamizda 7 yosh farq bor. Men 1998-yilda, Islom akam 1991-yilda tug‘ilgan. Millatim o‘zbek, lekin bari bir tojik qoni bor. Tojik tilini uncha yaxshi bilmayman, Tojikistonda ham o‘zbeklar yashaydigan joyda yashaganman.
“Bir yil Islom akamga siz bilan gaplashmayman deb yurdim”
Pandemiya paytida “Bigo live” degan platformaga kirganman, qarasam hamma san’atkorlar bor ekan. O‘shanda Islom akani ko‘rdim, qaradim, tanish yuz, lekin tanimadim. Profiliga qarasam Uztim yozilgan ekan, keyin esladim. 2009-yilda ularning “Bora-bora” degan ashulalarini eshitgandim. “Bigo live”da ham pul topsa bo‘lar ekan, keyin ularga oddiy tanishga o‘xshab yozdim. Ular profilimga kirib rasmimni ko‘rgan ekan, men esa undan chiqib ketgan edim.
Oradan biroz vaqt o‘tgandan keyin men ham o‘zimning profilimni ochdim, jonli efir qilayotgan vaqtimda ular ham kirdilar. Shunda ikkalamiz ham o‘n yillik tanishdek gaplashganmiz, bir hafta o‘tib Islom aka menga sevgi izhor qildi. Menga sizni yoqtirib qoldim, uyimdagilarni yubormoqchiman deganlarida hazillashyapti deb o‘ylaganman. Avvaliga kim bilandir bahs boylagan deb o‘yladim, keyin men ularni aka sifatida qabul qilganimni aytdim. Ular esa: “Men sizga singil sifatida qaramaganman, yoqib qoldingiz”, — deb aytgan.
Har kun jonli efirda birga suhbatlashar edik, orada bir qiz sababli urushib qolganmiz. Shundan keyin bir yarim oy bir-birimizning jonli efirimizga kirmaganmiz, qanaqadir sabab bilan yana gaplashib ketganmiz. Bir yil ularga siz bilan gaplashmayman deb yurdim. Oxiri menga aytmasdan katta opam bilan gaplashib uydagilarini jo‘natgan.
“Hattoki bir burda non bilan oqqand yegan kunimiz bo‘lgan”
Eng katta armonim — to‘ylarimizda otamni ko‘ra olmasligim. Yomon kunlarimizda yoki turmushga chiqib ketganimizdan keyin oyim yolg‘iz qolib ketadilar, men esa buni xohlamayman. Yonlarida qola olmaymiz, otam bo‘lganlarida shunaqa bo‘lmas edi, deb o‘ylaymiz.
Bu narsalarni ochiq-oydin aytish qanchalik to‘g‘riligini bilmayman. Onamni xafa qilishgan, kichkina bo‘lib turib kuchim yetmaganini his qilish menga alam qilgan. Men qarindoshlar tomonidan onamga qilingan qattiq gap-so‘zlar bo‘lganini ko‘rganman. Hozir shu davr keldi, men javobimni qaytarayapman. U paytda o‘n yosh bo‘lganman, hozir esa 24 yoshdaman, oradan 14 yil o‘tdi. Vaqt o‘tdi suv tiniqlashdi degani emas.
Vaqti keladi, hamma narsani ochiq-oydin aytaman. O‘shanda xalq bilgandan keyin uyalib qolishmasa bo‘ldi. Xalq bilishi kerak, hamma narsa shunchaki bo‘lmagan. Shunchaki biz bu darajaga yetib, katta qiz bo‘lib qolmadik. Hozir hamma singlim, jiyanim, opam deydi, biz tomonga qadamlar endi boshlandi. Oyim 40 yoshida beva qolgan. O‘sha paytda Tojikistonda bir yil yashab O‘zbekistonga ko‘chib kelganmiz.
Hattoki bir burda non bilan oqqand yegan kunimiz bo‘lgan. Hozir yurganlarning hech qaysi oldimizda yo‘q edi. Orqamizdan maqtab gapiradiganlar o‘sha paytda qayerda edi, deyman. Kichkinaligimizda bizning haqqimizni yeb, otamning bir tiyinigacha olib qo‘yishdi. Xalq bilishi kerak bo‘lgan juda ko‘p narsa bor, buni ochiqlashim uchun yana ozgina vaqt kerak.
“Onam tonggacha otamning oyog‘ini bosib chiqardi”
Qanaqa qilib mening oldimga kelib: “Otangiz nima sababdan o‘lgan?”, “Eshitishim bo‘yicha otangizni o‘ldirib ketishgan” deb aytishadi? Agar mening otamni kimdir o‘ldirib yuborgan bo‘lganida Tashkent City degan joyda bittagina otamning haykali bo‘lmas edi. Undan tashqari shunaqa bo‘lganida bizni ham yo‘q qilib yuborishlari kerak edi. Otam jigar serrozi sabab vafot etgan.
Kichkinaligimdagi har bir kun esimda. Onam otamni opichib yurar edi, ular hattoki yura olmaydigan holatga kelib qolgan edi, tonggacha ularning oyog‘ini bosib chiqardi. Otamning qiynalib qanday ovoz chiqargani ham esimda, hammasi qulog‘imda qolib ketgan. Uyning ichida bo‘lgan narsa uyning ichida qolishi kerak, lekin xalq bizni noto‘g‘ri tushunmasligi uchun ochiqladim. Otam oxirgi marta uydan chiqib ketayotganlarida: “Onangizni xafa qilmanglar, ertaga men qaytib kelib har biringiz haqida onangizdan so‘rayman. Men ertaga kelaman”, — degan edilar. Aravachada olib ketishgan kunning ertasida otam vafot etgan.
Mavzuga doir:
Izoh (0)