2022 йил декабрь ойида 54 ёшни қаршилаган австралиялик актёр болалигидаги психологик травма туфайли терапия олишини тан олди. «Бу менга яхши ёрдам берди, — дейди актёр. — Аслида ҳаммамиз қўллаб-қувватлашга муҳтожмиз».
Жекманнинг қўшимча қилишича, машғулотлар унга ўтмиш билан келишишга ва яқинлари билан яхшироқ мулоқот қилишга ёрдам беради: «Энг муҳими, терапия яқинларим билан муносабатларимга ёрдам беради, мени чинакам тушунишга ва ўзимни уларнинг ўрнига қўйишга ўргатади».
Болалигида актёр онасидан ажралишига мажбур бўлади. Унинг онаси Грэйс тўсатдан эри ва 5 фарзандини Австралияда қолдириб, ватани Англияга қайтганида Хью 8 ёшда эди. Бу ҳақда оила телеграмма орқали хабар топади. Актёр буни шундай эслайди: «Бу жуда оғир зарба бўлди. Мен у қайтиб келиши мумкин деб ўйладим, аммо ундай бўлмади».
Фақат 12 ёки 13 ёшга келибгина Хью онаси энди қайтиб келмаслигини тушунади: «Дадам уни қайтариш учун Англияга борди, лекин ўша пайтда онам бошқа эркак билан турмуш қурган, боласи бор эди, — дейди актёр. — Дадам қайтиб келганида, мен ҳаммасини тушундим. Мен аллақачон ҳеч нарса ёрдам бермаслигини англайдиган ёшда эдим».
Ота-онаси ажрашгандан сўнг, актёрнинг 2 опаси онаси билан бирга кетади, Хьюнинг ўзи эса 2 акаси билан отаси ёнида қолади. Хью оиладаги энг кичиги эди. Онасини йилига бир марта кўрарди холос.
Бўлган воқеаларга қарамай, Жекман у ва онаси ўртасида алоқа борлигига ҳеч қачон шубҳа қилмаган. «Биламан, бу ғалати туюлиши мумкин, лекин онам мени севмаслигини ҳеч қачон ҳис қилмаганман, — деб тан олади австралиялик актёр. — Мен у билан бу ҳақда кўп гаплашганман, энди эса ўшанда у ўзи учун курашганини тушунаман».
Актёрнинг сўзларига кўра, онаси учун Англиядан Австралияга кўчиб ўтиш қийин бўлган. Хью дунёга келгач, туғуруқдан кейинги оғир депрессия туфайли узоқ вақт касалхонада ётади. Депрессия кўп йиллар давом этади, Грэйс баъзан қисқа муддатга уйдан чиқиб кетар, ўзини тузоққа тушиб қолгандек ҳис қиларди.
2011 йилда Хью интервьюсида шундай деганди: «Катта бўлганим сари онам нима учун кетганини тушундим. Ҳозир 43 ёшдаман, энг муҳими, биз ярашиб олдик».
Жекман ҳозирда онаси билан яхши муносабатда. У мунтазам равишда ижтимоий тармоқларда уни оналар куни ва туғилган куни билан табриклайди.
Улар бирга овқат пиширишни яхши кўради — Грэйс ўз рецептларини ўғли билан баҳам кўради. Ушбу рецептнинг фотосуратида она ўғлини меҳр билан Ҳюби деб чақираётганини кўриш мумкин.
Жекман — намунали оила бошлиғи, у «Коррелли» телесериалини суратга олиш пайтида танишган актриса Деборра-Ли Фурнесс билан 26 йилдан бери бахтли яшамоқда.
Ҳозирда эр-хотиннинг икки нафар фарзанди бор, уларни Фурнесснинг ҳомиладор бўлишга уринишлари муваффақиятсиз тугаганидан сўнг, асраб олишган. «Қизим ва хотиним учун ҳаёт бу — завқ бағишлайдиган катта швед столи. Қизим жуда киришимли, лекин ўғлим ундай эмас. У папарацциларни ёмон кўради, қизим эса аксинча».
Шунингдек, актёр болаларни ўзларига ишонишга ўргатиш жуда муҳимлигини ҳам қўшимча қилади.
Мавзуга доир: «Ўртадаги 13 ёш фарқ паспортдаги рақамлар холос»: актёр Хью Жекман рафиқаси билан бирга ўтказган яхши-ёмон кунлари ҳақида
Изоҳ (0)