Toshkentda qurilish ishchilari ovqatdan zaharlangani yuzasidan jinoyat ishi qo‘zg‘atildi

Toshkentdagi Nest One turar joy majmuasini qurish ishlari bilan shug‘ullanayotgan xorijiy kompaniya ishchilari ovqatdan zaharlangani yuzasidan jinoyat ishi qo‘zg‘atildi.

Bosh prokuratura matbuot kotibi Hayot Shamsutdinovning “Daryo” so‘roviga asosan ma’lum qilishicha, 9 nafar ichchi-xodim zaharlangan. Mazkur holat yuzasidan olib borilgan tergovga qadar tekshirish harakatlari natijasiga ko‘ra, Shayxontohur tumani prokuraturasi tomonidan 16-yanvar kuni Jinoyat kodeksining 186-moddasi 2-qismi bilan jinoyat ishi qo‘zg‘atilgan.

Ayni paytda dastlabki tergov harakatlari olib borilmoqda. Aybdor shaxslarning harakatlariga huquqiy baho berilishi ta’minlanadi.

Sanitariya-epidemiologik osoyishtalik va jamoat salomatligi xizmati bergan ma’lumotga ko‘ra, ishchilar tez tibbiy yordam mashinasida Respublika ixtisoslashtirilgan epidemiologiya mikrobiologiya va parazitar kasalliklar ilmiy-amaliy tibbiyot markazi qabul bo‘limiga ovqat toksikoinfeksiyasi shubhasi bilan olib kelingan.

Bemorlarga birlamchi tibbiy yordam ko‘rsatilgan. Ularning ahvoli qoniqarli darajada.