Qoraqalpog‘istonning Xo‘jayli tumanida onasi va imkoniyati cheklangan akasini kaltaklagan shaxsga sud hukmi o‘qildi. Bu haqda Xo‘jayli tumani hokimligi xabar berdi.
Ma’lum qilinishicha, mazkur holat Jinoyat ishlari bo‘yicha Xo‘jayli tumani sudida ko‘rib chiqilgan.
Jinoyat ishlari bo‘yicha tuman sudyasi Ibrayim Allaniyazovning ma’lumot berishicha, onasi va akasini kaltaklagan 46 yoshli shaxs Ma’muriy javobgarlik to‘g‘risidagi kodeksning 183-moddasi (mayda bezorilik) va 187-moddasi (jamoat joylarida alkogol mahsulotini iste’mol qilish) bilan aybdor deb topilgan. Fuqaro 80 yoshli onasi va imkoniyati cheklangan akasini muntazam ravishda urib, ularni qiynoqqa solib kelgan.
Qo‘shimcha qilinishicha, jamoat joyida mast holda bezorilik qilgan 46 yoshli fuqaro uni tartibga chaqirishga uringan IIB xodimining qonuniy talablariga ham bo‘ysunmagan. Shu sabab Ma’muriy javobgarlik to‘g‘risidagi kodeksning yana bir moddasi talabini buzgan fuqaroga umumiy tarzda 15 sutka ma’muriy qamoq jazosi tayinlangan.
Xo‘jayli tumani hokimligi e’lon qilgan videoda o‘g‘lidan kaltak yeb, xo‘rlangan onaning “Yo‘q bo‘lsin, o‘ligi ham, tirigi ham kerakmas. Bu bechora (imkoniyati cheklangan akasi)ni har kuni uradi. Ichib kelsa ko‘ziga hech nima ko‘rinmaydi”, degan so‘zlarini eshitish mumkin.
Ijtimoiy tarmoqning qoraqalpoq segmentida ushbu video keskin muhokamalarga sabab bo‘lgan. Ko‘pchilik foydalanuvchilar fuqaroning onasi va akasiga nisbatan qilgan xatti-harakatlarini qoralab, 15 sutkalik ma’muriy qamoq jazosi aslida unga kamligi ta’kidlagan.
Izoh (0)